Шавкат Мирзиёев Миср президенти Абдулфаттоҳ ас-Сисига унинг ушбу лавозимга қайта сайлангани муносабати билан самимий табриклар ва энг эзгу тилаклар изҳор этилган мактуб йўллади.
Табрикда сўнгги йилларда биргаликдаги саъй-ҳаракатлар, қатъий сиёсий ирода ва олий даражадаги фаол мулоқотлар натижасида Ўзбекистон билан Миср ўртасидаги кўп қиррали ва узоқ муддатли алоқалар сифат жиҳатидан мутлақо янги босқичга олиб чиқилгани қайд этилган ва келгусида янада юксак поғонага кўтарилишига ишонч билдирилган.
Миср миллий сайлов комиссияси кетма-кет уч кун (10–12 декабрь) давомида ўтказилган 2024 йилги президентлик сайловлари натижаларини эълон қилди. Президентликка номзод Абдулфаттоҳ ас-Сиси жами 39 миллион 702 минг 451 овоз тўплаб, сайловда овозларнинг 89,6 фоизини олган ҳолда ғалаба қозонди.
Сайлов жараёнида амалдаги президентдан ташқари учта партиядан номзод иштирок этди, улар тўплаган овозлар қуйидагича:
- “Республика халқ партияси” етакчиси Ҳазим Умар 1,9 миллион овоз (4,5 фоиз);
- “Вафл” либерал партияси етакчиси Абдулсанад Ямама 822,6 минг овоз (1,9 фоиз);
- “Миср социал-демократик партияси” раиси Фарид Заҳрон 1,7 миллион овоз (4 фоиз).
Ҳукуматнинг хабар беришича, 489,3 минг овоз яроқсиз деб топилган, бу умумий овозларнинг 1,1 фоизини ташкил қилади.
Ас-Сисининг биринчи муддати 2014 йилда Муҳаммад Мурсий ва “Мусулмон биродарлар” исломий ташкилоти ҳокимиятдан четлатилганидан кейин бошланган.
2018 йилда ас-Сиси иккинчи муддатга қайта сайланган. 2019 йил апрель ойида референдум бўлиб ўтди, унда Миср президентига янги муддатга ўз номзодини қўйиш ва ваколат муддатини тўрт йилдан олти йилгача ошириш имкониятини берувчи тузатишлар қабул қилинди.
Изоҳ (0)