Amudaryoda suv sathining pasayishi Qashqadaryo viloyatida ichimlik suvi taqchilligiga sabab bo‘la olmaydi. Bu haqda “Qashqadaryo suv ta’minoti” MCHJ direktori Bekzod Shoimov ishtirokida jurnalist va blogerlar uchun tashkil qilingan matbuot anjumanida gapirilgan.
Matbuot anjumanida qatnashgan bloger Namoz Choriyevning “Daryo”ga bildirishicha, muloqotda so‘z olgan jurnalist Nuriddin Egamov mas’ullarga yuzlanib, “Amudaryo havzasida suv sathining kamayishi Qashqadaryoda suv taqchilligiga sabab bo‘ladimi?”, — deya savol bergan.
Jamiyat direktori Bekzod Shoimov va mas’ullar jurnalist savoliga javob qaytarib, “Qishloq xo‘jaligi sohasida muammo bo‘lishi mumkin. Biroq ichimlik suviga ta’sirini o‘tkazmaydi”, deb javob bergan.
Tolimarjon suv omboridan olayotgan suvimiz hajmi unchalik katta emas. Suv omboridan olinadigan suv 10 million metr/kub atrofida bo‘ladi. Xulosa qilinganda, bundan xavotirimiz yo‘q. Qishloq xo‘jaligi sohasida qandaydir muammolar kuzatilishi mumkin. Biroq bu ichimlik suviga o‘z ta’sirini o‘tkazmaydi. Suvimiz yetarli”, — deydi jamiyat direktorining o‘rinbosari To‘lqin Yoqubov.
Mas’ullarning qo‘shimcha qilishicha, tabiiy omillar, ya’ni yog‘ingarchilik holati ham sohada muhim ahamiyat kasb etadi.
.jpg)
O‘tgan yoz faslida yog‘ingarchilik yaxshi bo‘lmadi. Natijada ba’zi quduqlarimizda suv sathi 5-10 metrga pastlab ketdi. Bu esa ortiqcha xarajatlarga sabab bo‘ladi, — deydi mas’ullar.
Avvalroq 2050-yilgacha Sirdaryo havzasida suv resursi 5 foizga, Amudaryo havzasida 15 foizgacha kamayishi kutilayotgani xabar berilgandi.
Izoh (0)