Human Rights Watch (HRW) inson huquqlari tashkiloti Isroil hukumatini G‘azo sektorida sun’iy ravishda ocharchilik yaratishda aybladi. Bu haqda tashkilot saytida xabar berildi.
Isroil urush olib borish usuli sifatida tinch aholiga ocharchilik orqali azob berayotgani, bunday harakatlar “harbiy jinoyat” sanalishi ta’kidlangan.
“Isroil harbiy kuchlari ataylab suv, oziq-ovqat va yoqilg‘i yetkazilishiga qarshilik qilmoqda, shu bilan birga gumanitar yordamga ataylab to‘sqinlik qilmoqda, aftidan, qishloq xo‘jaligi yerlarini vayron qilmoqda va tinch aholini yashashi uchun zarur bo‘lgan narsalardan mahrum qilmoqda”, — deyiladi bayonotda.
HRW Isroil hukumatini ochlikni “urush usuli” sifatida qo‘llashni to‘xtatishga va G‘azo sektoridagi “blokada”ni bekor qilishga chaqiradi. Tashkilot, shuningdek, AQSH, Buyuk Britaniya, Kanada, Germaniya va boshqa davlatlarni Isroilga harbiy yordamni to'xtatishga chaqirdi.
“Isroil hukumati suv va elektr energiyasidan foydalanishni tiklashi, shuningdek, juda zarur bo‘lgan oziq-ovqat, tibbiy yordam va yoqilg‘ining G‘azoga, jumladan Kerem Shalom nazorat o‘tkazish punkti orqali yetkazib berilishiga ruxsat berishi kerak”, — deya taʼkidlaydi tashkilot.
Izoh (0)