Human Rights Watch (HRW) инсон ҳуқуқлари ташкилоти Исроил ҳукуматини Ғазо секторида сунъий равишда очарчилик яратишда айблади. Бу ҳақда ташкилот сайтида хабар берилди.
Исроил уруш олиб бориш усули сифатида тинч аҳолига очарчилик орқали азоб бераётгани, бундай ҳаракатлар “ҳарбий жиноят” саналиши таъкидланган.
“Исроил ҳарбий кучлари атайлаб сув, озиқ-овқат ва ёқилғи етказилишига қаршилик қилмоқда, шу билан бирга гуманитар ёрдамга атайлаб тўсқинлик қилмоқда, афтидан, қишлоқ хўжалиги ерларини вайрон қилмоқда ва тинч аҳолини яшаши учун зарур бўлган нарсалардан маҳрум қилмоқда”, — дейилади баёнотда.
HRW Исроил ҳукуматини очликни “уруш усули” сифатида қўллашни тўхтатишга ва Ғазо секторидаги “блокада”ни бекор қилишга чақиради. Ташкилот, шунингдек, АҚШ, Буюк Британия, Канада, Германия ва бошқа давлатларни Исроилга ҳарбий ёрдамни тўхтатишга чақирди.
“Исроил ҳукумати сув ва электр энергиясидан фойдаланишни тиклаши, шунингдек, жуда зарур бўлган озиқ-овқат, тиббий ёрдам ва ёқилғининг Ғазога, жумладан Керем Шалом назорат ўтказиш пункти орқали етказиб берилишига рухсат бериши керак”, — дея таъкидлайди ташкилот.
Изоҳ (0)