Rossiyada sud muxolifatchi Aleksey Navalniyning da’volarini ko‘rib chiqishni siyosatchi “qayerdaligi aniqlangunga qadar” to‘xtatib qo‘ydi. Bu haqda BBC xabar berdi.
Muxolifatchi Kira Yarmish (Rossiyada “xorijiy agentlar” reyestriga kiritilgan) matbuot kotibi tegishli ma’lumotni berdi. Navalniyning sheriklari muxolifatchi 13 kundan beri daraksiz ekanidan xavotirda.
“Bugun Alekseyning yettita sudi bo‘lishi kerak. Dastlabki ikkitasi allaqachon bo‘lib o‘tgan. Sud ishlari Navalniyning qayerda ekanligi aniqlanmaguncha to‘xtatildi”, — dedi Yarmish.
Uning so‘zlariga ko‘ra, dam olish kunlari Navalniyning sheriklari butun mamlakat bo‘ylab 200 dan ortiq tergov izolyatorlariga murojaat qilishgan: “Javoblarni kutamiz”.
“Navalniy jamoasi” sudya “da’vogarning paydo bo‘lishini ta’minlashi” va sud jarayonini to‘xtatmasligi kerakligini bildirdi.
Federal jazoni ijro etish xizmati (FSIN) Navalniy IK-6 koloniyasida emasligi haqidagi ma’lumotnoma olib keldi. FSIN vakillari uning aniq qachon olib ketilgani va qayerga olib ketilganini “bilmaydilar”. Sudya “nega olib ketildi?” deb so‘raganida, ular “jazoni o‘tash uchun”, deb javob berishdi, — deyiladi xabarda.
2023-yilning avgust oyida Moskva shahar sudi allaqachon hibsda bo‘lgan Navalniyni “ekstremistik jamiyat” tashkil etishda ayblab, maxsus rejimdagi koloniyaga 19 yilga hukm qilgandi.
6-dekabr kuni siyosatchining sheriklari Navalniyga advokat bilan uchrashishga ruxsat berilmagani haqida xabar berdi.
O‘shandan beri muxolifatchi hech qachon koloniyaga qarshi da’volari bilan bog‘liq uchrashuvlarga video aloqa orqali ishtirok etmagan. Siyosatchining sheriklariga ko‘ra, FSIN Navalniyning bir necha kun davomida sud majlisiga kelmaganini koloniyada “baxtsiz hodisa” yuz bergani va svet yo‘qligi bilan izohlagan.
11-dekabr kuni Navalniyning advokatiga siyosatchi boshqa koloniyaga o‘tkazilgani haqida xabar berilgan.
“Hozirgina IK-6 koloniyasidan advokatga kelib, mahbus Navalniy endi ular ro‘yxatida yo‘qligini aytishdi. Ular uning qayerga o‘tkazilganini aytishdan bosh tortmoqda”, — deb yozgan Yarmish.
Shundan so‘ng Baza Telegram kanali manbaga tayanmasdan, Navalniy vandalizm bo‘yicha yangi jinoiy ish bo‘yicha tergov harakatlarini o‘tkazish uchun Moskvaga ko‘chirilganini da’vo qildi. Ertasi kuni Ivan Jdanov X ijtimoiy tarmog‘ida Navalniyning sheriklari “Moskvadagi tergov izolyatorlarining aksariyatini tekshirgan” va siyosatchini u yerda topa olmaganini yozdi.
15-dekabr kuni Navalniyning shikoyatlaridan biri bo‘yicha sud majlisida muxolifatchi Vladimir viloyatidan tashqarida joylashgan koloniyaga o‘tkazilgani haqida ma’lumot eshitildi.
Koloniyadan ko‘chirish tartibi qanday?
Koloniyadan ko‘chirilish qoidalariga ko‘ra, mahkum boshqa muassasaga o‘tkazilgani haqida so‘nggi daqiqada bilib oladi. FSIN mahkumning qarindoshlariga uning joylashgan joyi to‘g‘risida faqat mahkum oxirgi manzilga etib kelganidan keyin xabar berishga majburdir.
Ko‘chirilish jarayoni ko‘pincha Federal jazoni ijro etish xizmatining moddiy-texnik ta’minoti tufayli haftalar, hatto oylar davom etadi — bir koloniyadan ikkinchisiga o‘tayotganda, mahbus bir nechta tranzit qamoqxonalarga tashrif buyurishi mumkin.
FSIN yangi muassasaga o‘tkazish to‘g‘risida xabarnomani qarindoshlariga pochta orqali yuborishi mumkin va bu kerak bo‘lganda uzoq davom etadi. FSIN advokatlar va qarindoshlarining mahbusning o‘tkazilish vaqtida qayerda ekanligi haqidagi so‘rovlariga javob bermaydi. Darhaqiqat, inson himoyasiz va jamoatchilik nazoratisiz g‘oyib bo‘ladi.
Izoh (0)