Япония Мудофаа вазирлиги мамлакат тарихида биринчи марта аёл кишига Денгизда ўзини ўзи мудофаа қилиш кучларидаги энг юқори адмирал унвонини берди — 57 ёшли Нацуэ Кондо маҳаллий бош инспектор лавозимига тайинланди. Бу ҳақда NHK телеканали хабар берди.
Маҳаллий бош инспектор Япония бўйлаб мудофаа ва хавфсизлик учун масъул бўлган минтақавий идоралардаги энг юқори лавозим ҳисобланади. Бундай бўлинмалар бешта нуқтада жойлашган бўлиб, мудофаа хавфсизлиги ва табиий офат оқибатларини бартараф этиш, шунингдек, патрул кемалари ва турли жиҳозлар ёрдамида Япония чегараси атрофидаги воқеаларни кузатиш учун масъулдир.
Япониянинг денгизда ўзини ўзи мудофаа қилиш кучлари ташкил этилган 1954 йилдан буён аёл киши биринчи марта бундай юксак унвон ва лавозимга эга бўлмоқда.
Кондо 1966 йилда туғилган. Ямагучи университетининг гуманитар фанлар (япон тили ва адабиёти) факультетини тамомлаган ва мактабда япон тили ўқитувчиси бўлиб ишлаган. Университетни тугатгандан бир йил ўтгач, у Япониянинг денгизда ўзини ўзи мудофаа қилиш кучларига хизматга киради.
Кондо кемада хизмат қилишни истаган, аммо аёллар учун бунга шароит йўқ эди, шунинг учун у бухгалтерия ҳисоби ва таъминот билан шуғулланган. 2016 йилда у адмирал ёрдамчиси унвонига муносиб топилган биринчи аёл бўлди. Шундан сўнг у Оминато ҳарбий-денгиз базаси минтақавий бўлинмаси штаб бошлиғи ва офицерлар номзоди мактабининг директори бўлиб ишлади.
NHK телеканали маълумотларига кўра, Япония Мудофаа вазирлиги келаси йилда юқори мартабали зобитлар орасида аёллар улушини камида 5 фоизга оширишни режалаштирмоқда.
Изоҳ (0)