Shveta Bachchan Nanda — afsonaviy aktyorlar Amitabh Bachchan va Jaya Bhadurining to‘ng‘ich farzandi. Uning ukasi Abhishek va kelini Ayshvariya ham hind kinosi yulduzlari.
Ammo Shveta imkoniyatlar va aloqalarga qaramay, kinoda rol o‘ynashni xohlamaydi. Buning o‘rniga ikkala bobosi — mashhur shoir Harivansh Ray Bachchan va jurnalist-yozuvchi Tarun Kumar Bhadurining merosini davom ettiradi.
Shveta bolaligini shunday eslaydi: “Bolaligimda juda uyatchan qiz edim. Olomonni ko‘rganimda doim onamning orqasiga yashirinardim. O‘ylaymanki, odamovilik men uchun ikkinchi xarakterga aylandi. Biz o‘sib-ulg‘aygunimizcha o‘ta himoyalangan hayotda yashadik.
Ota-onam Bombeyga ishlash va pul topish uchun kelishgan, 70-yillar edi. Otam ko‘p ishlagan, kunini ertalabdan kechgacha suratga olish maydonchasida o‘tkazardi.
Biz katta oilada yashardik — ammalarim, amakivachchalarim va ukalarim doimo birga edi. Bobo-buvilarimiz ham biz bilan birga yashagan. Men har qanday e’tiborni yoqtirmasdim va aktrisalik men uchun emasligini darhol angladim”.
Shveta Bachchan 1974-yil 17-martda ota-onasining to‘yidan roppa-rosa 9 oy o‘tib Bombeyda tug‘ilgan. Ikki yil o‘tgach, uning ukasi Abhishek dunyoga keladi. Shveta onasi va qizi bilan bergan kamdan kam intervyularidan birida shunday deb tan oladi: “Onam har doim atrofimdagi do‘stlarimga juda e’tiborli edi.
Men Bharatnatyam, klassik musiqa, suzish bilan shug‘ullanishim, sitar va pianino chalishni bilishim kerak edi. Agar onamga biror narsa yoqmasa, darhol meni kaltaklardi. Va bu juda tez-tez sodir bo‘lardi. Bir kuni onam chizg‘ich sinib ketguncha urgan”.
Bunga Jaya Bachchan qo‘shimcha qiladi: “Abhishekni hech kim urmasdi. Negadir to‘ng‘ich farzandni kaltaklash kerakligiga ishonchim komil edi. Men ham oilada katta farzand bo‘lganman, meni ham tez-tez urishardi, lekin singillarimga hech qachon tegishmasdi. Shveta bolaligida juda odamovi va qaysar edi. To‘g‘risini aytsam, ota-onalar o‘zlaridan jahli chiqsa, vaziyatga chiday olmay farzandlarini kaltaklashini o‘sha paytda tushunmaganman”.
Aytishlaricha, Shveta Amitabhning, Abhishek esa Jayaning sevimlisi edi. Ammo o‘smirlik chog‘ida ikkalasi ham Londonga yuboriladi: Shveta amakisinikiga yashashga, Abhi esa maktab-internatga. O‘sha paytda oila qiyin davrni boshidan kechirayotgandi. Amitabh boshqa aktrisalar bilan suratga olish maydonchasidan tashqarida ham tobora ko‘proq ko‘rinar, Jaya esa asabiylashganidan o‘zida emasdi.
Ammo Bachchanlar oilasi bu qiyinchiliklarni yengib o‘tishadi va endi jurnalistlar Shvetadan oilasini bir so‘z bilan qanday tasvirlashini so‘rashganda, u shunday javob beradi: “Menimcha, biz juda ahil oilamiz!”
Biroq Shvetaning o‘z oilasi haqida bunday deb bo‘lmaydi. 22 yoshida u afsonaviy Raj Kapurning nabirasi Nikhil Nandaga turmushga chiqadi. Uning amakilari mashhur aktyorlar — Rishi Kapur, Randhir Kapur va Rajiv Kapur, amakivachchalari esa Bollivud yulduzlari Karishma Kapur, Karina Kapur va Ranbir Kapur edi.
Nikhil biznes-magnat, Rajning to‘ng‘ich qizi Ritu Nandaning o‘g‘li edi. O‘zining intervyularidan birida u Shvetani ziyofatda ko‘rib sevib qolganini va darhol “Bu o‘sha! Men butun umrimni birga o‘tkazmoqchi bo‘lgan qiz”, deb o‘ylaganini aytadi.
U hech qachon Amitabh va uning mashhurligidan cho‘chimagan va qo‘rqmay Shvetaning qo‘lini so‘raydi. Albatta, Raj Kapurni shunchaki “bobo” deb hisoblagan yigit uchun Amitabhning nomi va shuhrati unchalik ahamiyatli emasdi.
Shveta va Nikhil 1997-yil 16-fevralda turmush quradi.O‘sha yilning dekabrida ularning qizi Navya Navelli, uch yildan so‘ng esa o‘g‘li Agastya dunyoga keladi. Shveta turmush o‘rtog‘i bilan Dehliga ko‘chib o‘tadi va ommaviy axborot vositalaridan uzoqda oilaviy hayot kechiradi. Biroq 2018-yilda u kutilmaganda ota-onasining uyiga qaytib keladi va hozirgacha ular bilan birga yashaydi. Yaqinda otasi Amitabh unga mashhur oilaviy uy — “Pratiksha”ni sovg‘a qildi.
Shveta ajrashish sababi haqida gapirmaydi. U odatda eri haqida gapirishni va u bilan biror joyda ko‘rinishni xohlamaydi. Ammo uning intervyusidan er-xotin uzoq vaqt birga yashamaganligini tushunish mumkin.
U shunday deydi: “Qayerdadir o‘qigandim, har yetti-sakkiz yilda hayotimiz, dunyoqarashimiz va boshqa ko‘p narsalar butunlay o‘zgarib turadi. Bu ilon terisini tashlayotganga o‘xshaydi. Bu narsa 40 yoshdaligimda sodir bo‘ldi. Ikkala farzandim ham uydan uzoqda, maktab-internatda edi va birdan men qiladigan hech narsa yo‘qligini angladim. Men faqat devorlarga qarab aqldan ozaman deb o‘ylardim.
Men bolalarim o‘z hayotiga ega ekanini tushundim, erimning ham o‘z ishi bor va o‘zimga savol berdim: “Men nima qilishim kerak? Ha, men uyatchan va introvertman, lekin o‘zimning komfort zonamdan chiqib, yangi hayot boshlashim kerak edi. O‘z yo‘limni adabiyot va moda olamiga o‘zgartirishga qaror qildim”.
Jurnalistika Shvetaning haqiqiy kasbi bo‘lib chiqdi. U Daily News va Vogue India kabi nashrlar uchun maqolalar yozadi, shuningdek, “Jannat minoralari” romanini nashrdan chiqardi. Salbiy sharhlarga qaramay, kitob bestsellerga aylanadi.
Keyinchalik 2018-yilda Shveta taniqli dizayner Monisha Jasingh bilan hamkorlikda MxS kiyim tarmog‘ini ishga tushiradi.
Shu yili Shveta zargarlik brendi reklamasida megayulduz otasi Amitabh bilan birga ekrandagi debyutini qiladi. Biroq keyinchalik brend bank xodimlarini salbiy ko‘rinishda ko‘rsatgani uchun qonuniy choralar ko‘rilishi bilan tahdid qilib, reklama qaytarib olinadi.
Shveta Bachchan hech qachon filmlarda rol o‘ynamagan bo‘lsa ham, Bollivudda juda mashhur. Hozir u 49 yoshda va o‘zining so‘zlariga ko‘ra, uning uchun hayot endi boshlanmoqda.
Izoh (0)