Швета Баччан Нанда — афсонавий актёрлар Амитабҳ Баччан ва Жая Бҳадурининг тўнғич фарзанди. Унинг укаси Абҳишек ва келини Айшвария ҳам ҳинд киноси юлдузлари.
Аммо Швета имкониятлар ва алоқаларга қарамай, кинода роль ўйнашни хоҳламайди. Бунинг ўрнига иккала бобоси — машҳур шоир Ҳариванш Рай Баччан ва журналист-ёзувчи Тарун Кумар Бҳадурининг меросини давом эттиради.
Швета болалигини шундай эслайди: “Болалигимда жуда уятчан қиз эдим. Оломонни кўрганимда доим онамнинг орқасига яширинардим. Ўйлайманки, одамовилик мен учун иккинчи характерга айланди. Биз ўсиб-улғайгунимизча ўта ҳимояланган ҳаётда яшадик.
Ота-онам Бомбейга ишлаш ва пул топиш учун келишган, 70-йиллар эди. Отам кўп ишлаган, кунини эрталабдан кечгача суратга олиш майдончасида ўтказарди.
Биз катта оилада яшардик — аммаларим, амакиваччаларим ва укаларим доимо бирга эди. Бобо-бувиларимиз ҳам биз билан бирга яшаган. Мен ҳар қандай эътиборни ёқтирмасдим ва актрисалик мен учун эмаслигини дарҳол англадим”.
Швета Баччан 1974 йил 17 мартда ота-онасининг тўйидан роппа-роса 9 ой ўтиб Бомбейда туғилган. Икки йил ўтгач, унинг укаси Абҳишек дунёга келади. Швета онаси ва қизи билан берган камдан кам интервьюларидан бирида шундай деб тан олади: “Онам ҳар доим атрофимдаги дўстларимга жуда эътиборли эди.
Мен Бҳаратнатям, классик мусиқа, сузиш билан шуғулланишим, ситар ва пианино чалишни билишим керак эди. Агар онамга бирор нарса ёқмаса, дарҳол мени калтакларди. Ва бу жуда тез-тез содир бўларди. Бир куни онам чизғич синиб кетгунча урган”.
Бунга Жая Баччан қўшимча қилади: “Абҳишекни ҳеч ким урмасди. Негадир тўнғич фарзандни калтаклаш кераклигига ишончим комил эди. Мен ҳам оилада катта фарзанд бўлганман, мени ҳам тез-тез уришарди, лекин сингилларимга ҳеч қачон тегишмасди. Швета болалигида жуда одамови ва қайсар эди. Тўғрисини айтсам, ота-оналар ўзларидан жаҳли чиқса, вазиятга чидай олмай фарзандларини калтаклашини ўша пайтда тушунмаганман”.
Айтишларича, Швета Амитабҳнинг, Абҳишек эса Жаянинг севимлиси эди. Аммо ўсмирлик чоғида иккаласи ҳам Лондонга юборилади: Швета амакисиникига яшашга, Абҳи эса мактаб-интернатга. Ўша пайтда оила қийин даврни бошидан кечираётганди. Амитабҳ бошқа актрисалар билан суратга олиш майдончасидан ташқарида ҳам тобора кўпроқ кўринар, Жая эса асабийлашганидан ўзида эмасди.
Аммо Баччанлар оиласи бу қийинчиликларни енгиб ўтишади ва энди журналистлар Шветадан оиласини бир сўз билан қандай тасвирлашини сўрашганда, у шундай жавоб беради: “Менимча, биз жуда аҳил оиламиз!”
Бироқ Шветанинг ўз оиласи ҳақида бундай деб бўлмайди. 22 ёшида у афсонавий Раж Капурнинг набираси Никҳил Нандага турмушга чиқади. Унинг амакилари машҳур актёрлар — Риши Капур, Рандҳир Капур ва Ражив Капур, амакиваччалари эса Болливуд юлдузлари Каришма Капур, Карина Капур ва Ранбир Капур эди.
Никҳил бизнес-магнат, Ражнинг тўнғич қизи Риту Нанданинг ўғли эди. Ўзининг интервьюларидан бирида у Шветани зиёфатда кўриб севиб қолганини ва дарҳол “Бу ўша! Мен бутун умримни бирга ўтказмоқчи бўлган қиз”, деб ўйлаганини айтади.
У ҳеч қачон Амитабҳ ва унинг машҳурлигидан чўчимаган ва қўрқмай Шветанинг қўлини сўрайди. Албатта, Раж Капурни шунчаки “бобо” деб ҳисоблаган йигит учун Амитабҳнинг номи ва шуҳрати унчалик аҳамиятли эмасди.
Швета ва Никҳил 1997 йил 16 февралда турмуш қуради.Ўша йилнинг декабрида уларнинг қизи Навя Навелли, уч йилдан сўнг эса ўғли Агастья дунёга келади. Швета турмуш ўртоғи билан Деҳлига кўчиб ўтади ва оммавий ахборот воситаларидан узоқда оилавий ҳаёт кечиради. Бироқ 2018 йилда у кутилмаганда ота-онасининг уйига қайтиб келади ва ҳозиргача улар билан бирга яшайди. Яқинда отаси Амитабҳ унга машҳур оилавий уй — “Пратикша”ни совға қилди.
Швета ажрашиш сабаби ҳақида гапирмайди. У одатда эри ҳақида гапиришни ва у билан бирор жойда кўринишни хоҳламайди. Аммо унинг интервьюсидан эр-хотин узоқ вақт бирга яшамаганлигини тушуниш мумкин.
У шундай дейди: “Қаердадир ўқигандим, ҳар етти-саккиз йилда ҳаётимиз, дунёқарашимиз ва бошқа кўп нарсалар бутунлай ўзгариб туради. Бу илон терисини ташлаётганга ўхшайди. Бу нарса 40 ёшдалигимда содир бўлди. Иккала фарзандим ҳам уйдан узоқда, мактаб-интернатда эди ва бирдан мен қиладиган ҳеч нарса йўқлигини англадим. Мен фақат деворларга қараб ақлдан озаман деб ўйлардим.
Мен болаларим ўз ҳаётига эга эканини тушундим, эримнинг ҳам ўз иши бор ва ўзимга савол бердим: “Мен нима қилишим керак? Ҳа, мен уятчан ва интровертман, лекин ўзимнинг комфорт зонамдан чиқиб, янги ҳаёт бошлашим керак эди. Ўз йўлимни адабиёт ва мода оламига ўзгартиришга қарор қилдим”.
Журналистика Шветанинг ҳақиқий касби бўлиб чиқди. У Daily News ва Vogue India каби нашрлар учун мақолалар ёзади, шунингдек, “Жаннат миноралари” романини нашрдан чиқарди. Салбий шарҳларга қарамай, китоб бесцеллерга айланади.
Кейинчалик 2018 йилда Швета таниқли дизайнер Мониша Жасингҳ билан ҳамкорликда МxS кийим тармоғини ишга туширади.
Шу йили Швета заргарлик бренди рекламасида мегаюлдуз отаси Амитабҳ билан бирга экрандаги дебютини қилади. Бироқ кейинчалик бренд банк ходимларини салбий кўринишда кўрсатгани учун қонуний чоралар кўрилиши билан таҳдид қилиб, реклама қайтариб олинади.
Швета Баччан ҳеч қачон фильмларда роль ўйнамаган бўлса ҳам, Болливудда жуда машҳур. Ҳозир у 49 ёшда ва ўзининг сўзларига кўра, унинг учун ҳаёт энди бошланмоқда.
Изоҳ (0)