Namangan viloyatining Uchqo‘rg‘on tumanidagi shifoxonada bemor bolaning shprisi va dorilarini o‘zlashtirishga uringan hamshira ishdan olindi. Bu haqda Uchqo‘rg‘on tuman tibbiyot birlashmasi boshlig‘i D.Nazarova tomonidan imzolanib, “Daryo”ga taqdim qilingan ma’lumotnomada ma’lum qilingan.
Qayd etilishicha, ushbu voqea 2023-yilning 30-noyabr kuni soat taxminan 15:00 da Uchqo‘rg‘on tuman tibbiyot birlashmasining bolalar bo‘limida sodir bo‘lgan.
Voqea hamshira Z.R. ish vaqti tugab, navbatchi hamshiraga ish joyini topshirayotgan vaqtida sodir bo‘lgan. Bemor bolaning onasi hamshiraning harakatiga e’tiroz bildirib, askorbin kislota ampulasi, shpris qaytirib berilmaganligidan norozi bo‘lgan, — deyiladi mas’ulning ma’lumotnomasida.
Qo‘shimcha qilinishicha, ushbu holat bolalar bo‘limida tibbiyot xodimlari ishtirokida muhokama qilingan.
Hamshira Z.R. vazifasidan ozod qilindi. Bolalar bo‘limida bemorlarga tibbiy yordam ko‘rsatish qoidalari buzilgani uchun bo‘lim mudiri M.Atamirzayev hamda katta hamshira M.Nishonovalardan tushuntirish xati olingan. Va ularga nisbatan hayfsan intizomiy jazo chorasi qo‘llanilgan, — deydi birlashma boshlig‘i Nazarova.
Izoh (0)