Наманган вилоятининг Учқўрғон туманидаги шифохонада бемор боланинг шприци ва дориларини ўзлаштиришга уринган ҳамшира ишдан олинди. Бу ҳақда Учқўрғон туман тиббиёт бирлашмаси бошлиғи Д.Назарова томонидан имзоланиб, “Дарё”га тақдим қилинган маълумотномада маълум қилинган.
Қайд этилишича, ушбу воқеа 2023 йилнинг 30 ноябрь куни соат тахминан 15:00 да Учқўрғон туман тиббиёт бирлашмасининг болалар бўлимида содир бўлган.
Воқеа ҳамшира З.Р. иш вақти тугаб, навбатчи ҳамширага иш жойини топшираётган вақтида содир бўлган. Бемор боланинг онаси ҳамширанинг ҳаракатига эътироз билдириб, аскорбин кислота ампуласи, шприц қайтириб берилмаганлигидан норози бўлган, — дейилади масъулнинг маълумотномасида.
Қўшимча қилинишича, ушбу ҳолат болалар бўлимида тиббиёт ходимлари иштирокида муҳокама қилинган.
Ҳамшира З.Р. вазифасидан озод қилинди. Болалар бўлимида беморларга тиббий ёрдам кўрсатиш қоидалари бузилгани учун бўлим мудири М.Атамирзаев ҳамда катта ҳамшира М.Нишоновалардан тушунтириш хати олинган. Ва уларга нисбатан ҳайфсан интизомий жазо чораси қўлланилган, — дейди бирлашма бошлиғи Назарова.
Изоҳ (0)