Qashqadaryo viloyatining Muborak tumanida faoliyat yurituvchi tadbirkor biznes-ombudsman devonining viloyatdagi sho‘basiga murojaat qilib, unga soliq organi tomonidan asossiz ravishda 414 million so‘mlik soliq qarzdorligi chiqqanini, uning foizi 200 million so‘mdan oshganini aytib, yordam so‘ragan. Bu haqda “Daryo”ga biznes-ombudsman devonining viloyatdagi vakili Sheroz Shodiyev xabar berdi.
Aniqlanishicha, mazkur holat biznes-ombudsman ko‘magida bartaraf etilgan.
Biznes-ombudsman devoniga Muborak tumanida faoliyat yurituvchi “Farovon” MCHJ (tadbirkorlik subyektining nomi o‘zgartirilgan) soliq organlari tomonidan asossiz qarzdorlik yuzaga keltirilganidan norozi bo‘lib murojaat qildi. Muborak tuman soliq inspeksiyasi mansabdor shaxslari tomonidan 2019-yil 26-dekabrda MCHJga asossiz tarzda qo‘shilgan qiymat solig‘idan 414 million 679 ming 732 so‘mlik qarzdorlik yozilgan. Yuzaga kelgan asossiz qarzdorlikni to‘lash lozimligi to‘g‘risida MCHJga Qashqadaryo viloyat soliq boshqarmasi tomonidan 2023-yil 27-yanvarda talabnoma yuborilgan. Shuningdek, qarzdorlik sababli MCHJning qo‘shilgan qiymat solig‘i to‘lovchisi sifatida ro‘yxatdan o‘tkazilgani to‘g‘risida guvohnomaning amal qilish muddati 2023-yil 3-fevraldan to‘xtatilgan. 2023-yil 11-fevralda MCHJga tegishli ko‘chmas mulkka nisbatan taqiq qo‘yilgan. MCHJning ushbu holat yuzasidan bir qancha vakolatli davlat organlari va tashkilotlariga yo‘llagan murojaati e’tiborsiz qolgan, — deydi Sheroz Shodiyev.
Oqibatda 12 ta doimiy ish o‘rniga ega hamda yiliga o‘rtacha 500 ming dollar eksport qiluvchi korxonaning faoliyati vaqtincha to‘xtab qolgan.
MCHJning murojaati biznes-ombudsman devonining Qashqadaryo viloyatidagi sho‘basi tomonidan o‘rganilgan vaqtda asossiz qarzdorlik foiz hisoblangani sababli 633 million 619 ming so‘mni tashkil qilgan. Ushbu qonunbuzilish holati yuzasidan biznes-ombudsman tomonidan Qarshi tumanlararo ma’muriy sudiga MCHJ manfaatiga ariza kiritildi. Qarshi tumanlararo ma’muriy sudining 2023-yil 21-avgustdagi hal qiluv qarori bilan ariza qanoatlantirilib, soliq organi mansabdor shaxslari zimmasiga MCHJga nisbatan asossiz hisoblangan soliq summasini hisobdan chiqarish majburiyati yuklandi, — deydi mas’ul.
Qo‘shimcha qilinishicha, viloyat ma’muriy sudining 2023-yil 17-oktyabrdagi qarori bilan soliq organining appelyatsiya shikoyati rad qilinib, birinchi instansiya sudining qarori o‘z kuchida qoldirilgan.
Izoh (0)