So‘nggi yillarda mamlakatimizda tadbirkorlik faoliyatini yengillashtirish va uni rag‘batlantirish davlatning asosiy vazifalaridan biriga aylantirilib hukumat tomonidan tadbirkorlikni rivojlantirishga qaratilgan qonun, qaror, farmon va boshqa turdagi normativ-huquqiy hujjatlar ishlab chiqilganligini OAVda ko‘p eshitganmiz.
Mazkur yo‘nalishdagi ishlarni jadallashtirish maqsadida, hamda joriy yil 7-noyabr kuni O‘zbekiston Respublikasi prezidenti ishtirokida o‘tkazilgan taqdimotda davlat rahbari tomonidan berilgan topshiriqlar ijrosini ta’minlash borasida aholini kichik va o‘rta biznesga keng jalb qilishga qaratilgan O‘zbekiston Respublikasi prezidenti qarori loyihasi ishlab chiqildi.
Qarorning asosiy maqsadi – uning nomida ko‘rsatilganidek – aholini kichik va o‘rta biznesga jalb qilishdir.
Xo‘sh, ushbu maqsadlarga qanday erishiladi?
Mazkur qaror loyihasida aholini tadbirkorlikka jalb qilishning quyidagi tartibi belgilanmoqda:
a) kichik va o‘rta tadbirkorlarga “yagona darcha” tamoyili asosida moliyaviy xizmat ko‘rsatish uchun kichik biznesga ko‘maklashish markazlari va Tadbirkorlikni rivojlantirish kompaniyasi Savdo-sanoat palatasi hududiy boshqarmalari binolariga joylashtirilmoqda;
b) Savdo-sanoat palatasi (D. Vahobov), biznes-ombudsman (D. Qosimov), Mahallabay ishlash agentligi (M. Ubaydullayev) har hafta:
- mahallalarga chiqqan holda aholi va tadbirkorlarga kichik va o‘rta biznes uchun davlat tomonidan yaratilgan moliyaviy imkoniyatlarni tushuntirib boradi;
- kichik biznesga ko‘maklashish markazlarida aholi va tadbirkorlarni biznes ko‘nikmalariga o‘qitadi;
- kichik biznesga ko‘maklashish markazlari va Tadbirkorlikni rivojlantirish kompaniyasi bilan birga salohiyatli tadbirkorlarni aniqlab, ularning loyihalarini amalga oshirishga ko‘maklashadi.
Shu bilan birgalikda Iqtisodiyot va moliya vazirligiga bir qator tashkilotlar bilan birgalikda qaror kuchga kirganidan keyin bir hafta muddatda davlat dasturlarida nazarda tutilgan imkoniyatlar va ularda ishtirok etish shartlari to‘g‘risida taqdimot materiallari
va videoroliklardan iborat namunaviy qo‘llanmalar tayyorlab, Respublika komissiyasi a’zolari va hududiy komissiyalarga yetkazilishi hamda elektron platformalarda joylashtirilishi yuklatilgan
Kichik va o‘rta biznes mamlakatning iqtisodiy rivojlanishida muhim rol o‘ynaydi va uning rivojlanishining ijobiy tomonlari bu:
1) Iqtisodiy o‘sishni rag‘batlantirilishi: kichik va o‘rta biznes yangi ish o‘rinlarini yaratishga va umumiy bandlikni oshirishga hissa qo‘shadi, bu esa iqtisodiy o‘sishga yordam beradi.
2) Innovatsion va texnologik taraqqiyot: kichik va o‘rta biznes innovatsiya va texnologik taraqqiyotning “dvigateli” sifatida hizmat qiladi. Ular ko‘pincha yangi g‘oyalar, ishlanmalar va texnologiyalar manbai hisoblanadi.
3) Kambag‘allikni va tengsizlikni qisqartirilishi: kichik va o‘rta biznesning rivojlanishi aholi daromadlarini oshirish va kambag‘allikni qisqartirishga yordam beradi.
4) Hududlarning rivojlanishi: kichik va o‘rta biznes sub’yektlari hududlarning, ayniqsa kichik shaharlar va qishloq joylarning mo‘tadil rivojlanishiga hissa qo‘shadi. Ushbu hududlarda kichik va o‘rta biznesni rivojlantirish va uni qo‘llab-quvvatlash investisiyalarni jalb qilishi va yangi ish o‘rinlari yaratishi mumkin.
5) Raqobatni rag‘batlantirilishi: kichik va o‘rta biznes bozorda raqobatni kuchaytirishga o‘z hissasini qo‘shadi. Misol tariqasida kichik va o‘rta biznes subyektlari va katta tadbirkorlik subyektlari o‘rtasidagi raqobat iste’molchilar uchun sifatliroq va arzonroq bo‘lgan tovar va xizmatlarni shaklantirishga xizmat qiladi.
Izoh (0)