Ўзбекистонда бизнес-омбудсман томонидан тадбиркорларнинг ҳуқуқларини ҳимоя қилиш борасида 3 126 та таъсир чораси қўлланилди. Бу ҳақда Бизнес-омбудсман девони ахборот хизмати хабар берди.
Маълум қилинишича, 2023 йилнинг 11 ойи давомида бизнес-омбудсманга тадбиркорлардан 8 мингдан ортиқ мурожаат келиб тушган. Мурожаатлар хусусиятлари бўйича таҳлил этилганда:
- 19 фоизи солиққа оид;
- 13 фоизи ер, кадастр ва архитектурага;
- 14 фоизи суд қарори ва суд қарори ижросига;
- 12 фоизи банк, кредитга;
- 7 фоизи инфратузилма ва бошқа масалаларга оид.
Шунингдек, “Тадбиркор виртуал офиси орқали 9 034 та мурожаат келиб тушган бўлиб, мазкур мурожаатларни кўриб чиқиш натижасида тадбиркорларга 19,4 миллиард сўмдан ортиқ кредит ажратилиши, 10,2 миллиард сўм миқдорида асоссиз тўланган солиқ суммалари қайтарилиши, 3,5 миллиард сўм пул маблағларини масъул идоралардан ундирилишида ёрдам кўрсатилган.
Шу билан бирга, аниқланган қонунбузилиши ҳолатлари бўйича 27 та тақдимнома киритилган, 140 нафар мансабдор шахсга нисбатан маъмурий баённома расмийлаштирилган, 65 нафар масъул шахсга интизомий жазо чораси қўлланилган.
Бизнес-омбудсман томонидан ўтган вақт давомида тадбиркорларнинг ҳуқуқларини ҳимоя қилиш борасида 3 126 та таъсир чораси қўлланилган:
- 33,5 миллиард сўмлик 121 та даъво аризаси;
- 107 та тақдимнома;
- 23 та огоҳнома;
- 47 та хулоса;
- 2 828 та маъмурий баённома шулар жумласидандир.
Натижада, 17,1 миллиард сўмлик даъво тадбиркорлар фойдасига қаноатлантирилган, 16 та қарор (ҳужжат) бекор қилинган ва 126 нафар масъул шахс интизомий жавобгарликка тортилган, 37 миллион сўмдан ортиқ асоссиз ҳисобланган қарздорлик бекор қилинган.
Аввалроқ Қашқадарёда экспортёрнинг 414 миллион сўмлик ноқонуний солиқ қарздорлиги ва унинг 200 млн сўмдан ошиқ фоизи бекор қилингани тўғрисида хабар берилганди.
Изоҳ (0)