Osiyo taraqqiyot banki (OTB) O‘zbekistonda kichik va o‘rta korxonalarni qo‘llab-quvvatlash va iqtisodiy o‘sishni rag‘batlantirish uchun 100 million dollar miqdorida siyosat choralariga asoslangan qarz ajratilishini maʼqulladi. Bu haqda bank matbuot xizmati xabar berdi.
OTBning Kichik va o‘rta korxonalarni rivojlantirish dasturi xususiy sektorni rivojlantirishga asoslangan iqtisodiy o‘sishni rag‘batlantirish va kichik hamda o‘rta korxonalarning COVID-19 pandemiyasi natijasida bo‘lgan kabi iqtisodiy zarbalarga chidamliligini oshirish uchun ularning faoliyat muhitini yaxshilashga yordam beradi. Bu dastur doirasidagi ikkinchi kichik dastur bo‘lib, birinchi kichik dastur doirasida Hukumat tomonidan amalga oshirilgan siyosat, tartibga solish va institutsional islohotlarga asoslanadi.
“Dastur OTBning O‘zbekistondagi kichik va o‘rta korxonalarni qo‘llab-quvvatlash bo‘yicha tizimli navbatdagi qadamidir. Mamlakat davlat iqtisodiyotidan oqilona umumiy makroiqtisodiy yondashuvga asoslangan bozor iqtisodiyotiga o‘tish bo‘yicha asosiy tarkibiy islohotlarni amalga oshirishni davom etar ekan, kichik va o‘rta korxonalar diversifikatsiyalangan iqtisodiy o‘sishni, samaradorlikni va qo‘shimcha qiymatga ega rasmiy bandlikni jadallashtirishda muhim rol o‘ynaydi”, — deydi OTBning Markaziy va G‘arbiy Osiyo bo‘yicha bosh direktori Yevgeniy Jukov.
Ta’kidlanishicha, OTB dasturi O‘zbekiston hukumatini yuqori foiz stavkalari va yuqori garov talablariga ega banklar hukmronlik qiladigan moliya sektorida kichik va o‘rta korxonalar o‘z rivojlanishining turli bosqichlari uchun zarur bo‘lgan turli moliya shakllaridan foydalanishda ular duch keladigan muammolarni har tomonlama hal etishda qo‘llab-quvvatlaydi.
Dastur biznes yuritish xarajatlarini oshiradigan va ayollar biznesiga nomutanosib taʼsir ko‘rsatadigan tartibga solish va maʼmuriy yuklarni yengillashtirishga yordam beradi. Bu eksport mahsulotlari va bozorlarni diversifikatsiya qilish, shuningdek, raqamlashtirish orqali samaradorlikni oshirish orqali kichik va o‘rta korxonalarning savdo raqobatbardoshligini oshirishga xizmat qiladi. Shuningdek, bozor talablariga javob beradigan ko‘nikmalarni, ayniqsa, ayollar va yoshlarning bunday ko‘nikmalarini ish bilan taʼminlanishi imkoniyalarini oshirish uchun rivojlantirishga ko‘maklashadi.
O‘zbekiston OTBga 1995-yilda aʼzo bo‘lgan. O‘shandan beri bank mamlakatga 10,8 milliard dollar miqdorida qarz, grant va texnik ko‘mak taqdim etgan. OTB o‘ta qashshoqlikka barham berish bo‘yicha saʼy-harakatlarini davom ettirib, rivojlangan, keng qamrovli va barqaror Osiyo va Tinch okeani mintaqasiga erishishga intiladi. OTB 1966-yilda tashkil etilgan bo‘lib, unga 68 mamlakat aʼzo bo‘lgan. Ularning 49 tasi mintaqada joylashgan.
Sentyabr oxirlarida Osiyo taraqqiyot banki (OTB) O‘zbekistonning 2023 va 2024-yil uchun iqtisodiy o‘sishi prognozini yaxshilagandi. Undan oldinroq esa OTB O‘zbekiston energiya taqsimlash tizimini raqamlashtirishga 200 mln dollar qarz ajratishi ma’lum bo‘lgan edi.
Izoh (0)