Кадастр агентлиги матбуот хизмати раҳбари Неъмат Отамуродов сўнгги вақтларда ижтимоий тармоқларда уй-жойлар учун кадастр ҳужжатларини тайёрлашда акция бўлиши кутилаётгани тўғрисида тарқалган хабарларга изоҳ берди.
Отамуродовнинг айтишича, бу мавзудаги хабарлар ҳам жуда оммалашиб боряпти. “Бу хабарларга бир оз тузатиш киритиш керак. Сабаби, хабарларда кадастр ҳужжатларини тайёрлаш жараёни акция деб номланяпти. Аслида акция эмас”, — дейди у.
Президент бошчилигида 27 октябрь куни ер ресурсларидан оқилона фойдаланиш, ер ҳисобини юритиш ҳамда кадастр хизматларини яхшилаш масалалари бўйича ўтказилган йиғилишда топографик ўлчовлар учун Кадастр агентлиги махсус самолёт ва аэрофотокамера, 112 та дрон билан таъминланиши, соҳани рақамлаштириш учун эса 6 та ахборот тизими ва маълумотлар маркази ишга туширилиши айтиб ўтилганди.
Шунингдек, йиғилишда мамлакатда 2,4 миллионта хонадоннинг эгалик ҳужжати йўқлиги, агар уларнинг кадастр ҳужжати қилинса, одамларга ҳуқуқий, иқтисодий жиҳатдан ёрдам бўлиши уқтирилган. Шу боис, ҳужжатсиз уй-жойларга эгалик ҳуқуқини бериш бўйича қонун лойиҳасини якунига етказиш вазифаси қўйилган.
Шунингдек, 2,4 миллионта хонадоннинг эгалик ҳужжати, кўчмас мулкларга эгалик ҳуқуқи бўлмаган, кадастр ҳужжатлари мавжуд бўлмаган уй-жойларга эгалик ҳуқуқини бериш мақсадида тегишли вазирлик ва идораларга қонун лойиҳасини ишлаб чиқиш топшириғи берилган. Бугунги кунда қонун лойиҳаси ишлаб чиқилмоқда.
“Ҳақиқатан ҳам ижтимоий тармоқларда хабар тарқалганидан кейин, аҳоли ўртасида ъуддабуронларъ кўпайди. ъТезкорлик билан иморат қуриб олиб, бу уйни 5-10 йил олдин қурганман деб иддао қилсам, ҳужжатлаштириб оламанъ деб ўйлаб юрган бўлишлари мумкин. Очиғини айтганда, улар хато ўйлашмоқда. Сабаби, Кадастр агентлиги томонидан ерларнинг ҳолатини ўрганиш бўйича Космик сёмкалар, хариталар бор. Улар ёрдамида 5-10 йил, ҳатто 20 йил ортга қайтариб текширишимиз мумкин.
Бу жараёнда инсонлар ўзларига зарар беришлари мумкин. Сабаби биринчидан ерларни ўзбошимчалик билан эгаллаб олганлик, у ерга ноқонуний қурилмани амалга оширганлик учун қонунчиликда маъмурий жавобгарликдан, жиноий жавобгарликкача чоралар белгиланган. Шунинг учун бундай тоифадаги инсонлар ҳозирги кунда ўзбошимчалик билан иморат қураётган бўлса, тезда бу ишларни тўхтатиб, ерни асл ҳолатига қайтаришларини сўраймиз”, — дейди агентлик вакили.
Аввалроқ Ўзбекистонда 2023 йил бошидан бери 3 минг гектардан ортиқ ерлар ўзбошимчалик билан эгаллаб олингани тўғрисида хабар берилганди. Шундан қонун бузилиши ҳолатини ихтиёрий бартараф этганлар сони 4235 тага етган.
Изоҳ (0)