“Maximum” kulgu jamoasi aktyori Oybek Teshaboyev YouTube’dagi Chotki.tv kanaliga bergan intervyusida vaynlar sabab oilada ko‘p muammolarga uchrashi va videolarini yaqinlari ko‘rishini istamasligi haqida gapirdi.
— Vaynlarni faqat tirikchilik uchun suratga olaman. Ammo bundan ko‘pincha uyalaman. Onam-ku, ularni ko‘rmaydi, ammo boshqa oila aʼzolarim ham ko‘rishlarini istamayman. Ko‘cha-kuyda birorta tanishim “Ana videoda bunday chiqibsiz”, desa ham xijolat chekaman. Qizlar bilan video suratga olishim albatta, ayolimga yoqmaydi. Bu borada ko‘p marta nizoli vaziyatlarga borganmiz. Ayolimni ham to‘g‘ri tushunaman, rashk qiladi. Bir-ikki marta muammo qilgandi “Shu videoning ortidan keladigan reklama puli bilan senga ko‘ylak olib beryapman”, deb ichini qizitib qo‘ydim. Shunday keyin indamadi.
Oilamdagi qiz-ayollarning suratini ijtimoiy tarmoqlarga joylashni umuman istamayman. Bir marta rahmatli buvim bilan tushgan rasmimizni joylaganman xolos. Rashkchi inson bo‘lganim uchun singillarimni ham o‘qitmaganmiz, egasiga topshirib yuborgunga qadar ko‘cha-kuyda yurishini ham jiddiy nazorat qilardim, — deydi Oybek Teshaboyev.
Komik aktyor Toshkentda pulsizlikdan qiynalgani va topib olgan pulining egasi chiqsa qaytarish niyati borligi haqida gapirdi.
— Uydagilarga magistraturaga kirdim deb aldab, “Shovvozlar”ning repetitsiyalarida ishtirok etardim. O‘sha paytlari “Oybek” metro yaqinida ijara uyda yashardim. Repetitsiyalar esa O‘zbekiston Milliy universitetida bo‘lardi. Bir kuni hatto, yo‘lkiraga ham pul topolmay qoldim. Ijara uydagi tanga pullarning barini yig‘ib, bitta jetonga yetadigan pul to‘pladim. “Amallab repetitsiyaga borsam, u yerga yigitlardan pul olib turarman”, deb yo‘lga tushdim. “Beruniy” metrosidan chiqishda yo‘ldan to‘rtburchak qilib taxlangan dollarni topdim. Ikki yozuvini ko‘rib “Ikki dollarni maydalasam, harna yo‘l pulim bo‘larkan”, deb sekingina pulni cho‘ntagimga solib, sal nariga borib uni ochdim. Ne ko‘z bilan qarayki, u 2 emas 20 AQSH dollari ekan. Shunaqa quvonib ketganman. Yo‘lkira bilan birga tushlik ham qilarkanman, deganman. Hozir ham shu pulning egasi chiqsa, qaytarishim kerak deb ko‘p o‘ylayman. Ammo o‘sha inson menga kerakli vaqtida pulini yo‘qotgan ekan. U sabab ancha muammolarim yechimini topgan, — deydi Oybek Teshaboyev.
Oybek Teshaboyev “Million”dan ketishining sababi va “Maxsimum” jamoasining reyting ololmayotganiga munosabatini bildirdi.
— “Shovvozlar” jamoasining konsertini tashkil qilish borasida Davron Kobulovning yoniga borganman. “Mayli qilamiz, ammo to‘rt ishtirokchi bilan konsert berish qiyin. Yaʼni yangi aʼzolarni olishingiz kerak”, degan. Ammo konsert g‘oyasi pishguniga qadar “Million” ikkiga ajralgan va jamoa tarkibiga yangi aʼzolar kerak bo‘lgan. Shu sabab “Shovvozlar”dagi to‘rt ishtirokchi “Million”ga qo‘shilganmiz. Nega jamoa tarkibidan chiqib ketganimiz haqida esa gapirishni istamayman. Shunday bo‘lishi kerak bo‘lgan, bo‘ldi.
“Maxsimum” nega ko‘tarilib ketmayotgani haqidagi savolga kelsak, jamoaning o‘ziga yarasha muxlislari bor. Qo‘ldan kelgancha harakat qilayapmiz, — deydi Oybek Teshaboyev.
Izoh (0)