G‘arbning rejalariga zid ravishda Ukraina intensiv operatsiyalarni davom ettirish uchun yetarlicha harbiy texnika bilan ta’minlanmadi, dedi Chexiya prezidenti Pyotr Pavel Corriere della Sera nashriga bergan intervyusida.
“Biz ukrainaliklarni artilleriya o‘q-dorilari bilan ta’minlash bo‘yicha va’dalarimizni bajarmadik, F-16 (qiruvchilarini) boshqarishga tayyorgarlik ham ko‘ngildagidek silliq ketmayapti”, — dedi Pavel.
U Ukraina Qurolli kuchlari Fransiya va Britaniyaning Storm Shadow raketalaridan so‘ng Germaniyaning Taurus raketalarini olishni kutgani, ammo Berlin hali yakuniy qarorga kelmaganini eslatdi. Pavelning fikricha, bu holat qurol yetkazib berishda nomutanosiblikni keltirib chiqaradi, noaniqlik esa Ukraina tomoniga harbiy rejalar tuzishda xalal beradi.
Jurnalist Chexiya prezidentiga yozda, Ukrainaning qarshi hujumi chog‘ida “har qanday natija muzokaralar uchun asos bo‘ladi” deb aytgan so‘zlarini eslatar ekan, hozirgi vaziyat Ukraina uchun dialog boshlashga qulay emasligini ta’kidladi.
“Men bu yil Ukrainada katta qarshi hujum qilish uchun faqat bitta imkoniyat bo‘lishini nazarda tutgandim. Qarshi hujumlar katta pul, mehnat va vaqt talab qiladi: bir yilda ikki-uchta yirik hujumni amalga oshirishning iloji yo‘q”, — deb javob berdi Chexiya rahbari.
Pavel uning bahosi bir necha omillarga asoslanganini esladi: Rossiya, AQSH va ehtimol, Ukrainada 2024-yilga rejalashtirilgan prezidentlik saylovlari, shuningdek, Ukraina infratuzilmasi hali ham keng ko‘lamli vayronagarchilikda ekani.
“(Ukraina) aholisi uchun qiyin bo‘ladi, hozirda Ukrainani qo‘llab-quvvatlayotgan mamlakatlarning ikkilanishi tufayli umidsizlik hissi ham kuchayadi. Va tabiiyki, bu qarshi hujum operatsiyalarini davom ettirish uchun unchalik qulay bo‘lmagan vaziyatni yuzaga keltiradi”, — deya qo‘shimcha qildi Chexiya prezidenti.
Avvalroq Pavel Rossiyani Yevropa uchun asosiy tahdid deb atab, shiddatli mojaroga tayyor bo‘lish zarurligini ta’kidlagandi.
Kreml bu fikrni “isterik kayfiyat” deb atadi. Rossiya prezidenti matbuot kotibi Dmitriy Peskov: “Rossiya Yevropaga emas, Yevropa Rossiyaga tahdid solmoqda” deb ta’kidladi. Rossiya tomoni G‘arbdan Ukrainaga qurol yetkazib berishni to‘xtatishni talab qilmoqda.
Izoh (0)