Ғарбнинг режаларига зид равишда Украина интенсив операцияларни давом эттириш учун етарлича ҳарбий техника билан таъминланмади, деди Чехия президенти Пётр Павел Corriere della Sera нашрига берган интервьюсида.
“Биз украиналикларни артиллерия ўқ-дорилари билан таъминлаш бўйича ваъдаларимизни бажармадик, Ф-16 (қирувчиларини) бошқаришга тайёргарлик ҳам кўнгилдагидек силлиқ кетмаяпти”, — деди Павел.
У Украина Қуролли кучлари Франция ва Британиянинг Storm Shadow ракеталаридан сўнг Германиянинг Taurus ракеталарини олишни кутгани, аммо Берлин ҳали якуний қарорга келмаганини эслатди. Павелнинг фикрича, бу ҳолат қурол етказиб беришда номутаносибликни келтириб чиқаради, ноаниқлик эса Украина томонига ҳарбий режалар тузишда халал беради.
Журналист Чехия президентига ёзда, Украинанинг қарши ҳужуми чоғида “ҳар қандай натижа музокаралар учун асос бўлади” деб айтган сўзларини эслатар экан, ҳозирги вазият Украина учун диалог бошлашга қулай эмаслигини таъкидлади.
“Мен бу йил Украинада катта қарши ҳужум қилиш учун фақат битта имконият бўлишини назарда тутгандим. Қарши ҳужумлар катта пул, меҳнат ва вақт талаб қилади: бир йилда икки-учта йирик ҳужумни амалга оширишнинг иложи йўқ”, — деб жавоб берди Чехия раҳбари.
Павел унинг баҳоси бир неча омилларга асосланганини эслади: Россия, АҚШ ва эҳтимол, Украинада 2024 йилга режалаштирилган президентлик сайловлари, шунингдек, Украина инфратузилмаси ҳали ҳам кенг кўламли вайронагарчиликда экани.
“(Украина) аҳолиси учун қийин бўлади, ҳозирда Украинани қўллаб-қувватлаётган мамлакатларнинг иккиланиши туфайли умидсизлик ҳисси ҳам кучаяди. Ва табиийки, бу қарши ҳужум операцияларини давом эттириш учун унчалик қулай бўлмаган вазиятни юзага келтиради”, — дея қўшимча қилди Чехия президенти.
Аввалроқ Павел Россияни Европа учун асосий таҳдид деб атаб, шиддатли можарога тайёр бўлиш зарурлигини таъкидлаганди.
Кремль бу фикрни “истерик кайфият” деб атади. Россия президенти матбуот котиби Дмитрий Песков: “Россия Европага эмас, Европа Россияга таҳдид солмоқда” деб таъкидлади. Россия томони Ғарбдан Украинага қурол етказиб беришни тўхтатишни талаб қилмоқда.
Изоҳ (0)