Toshkentda aholiga noqulaylik tug‘dirgan restoran faoliyati vaqtincha to‘xtatildi

Toshkent shahri Yakkasaroy tumani hududida joylashgan restoranlardan birining faoliyati aholiga noqulaylik tug‘dirib kelgani sabab to‘xtatildi. Bu haqda poytaxt hokimligi matbuot xizmati xabar berdi.

Ma’lum qilinishicha, Shota Rustaveli ko‘chasi 59-uyda istiqomat qiluvchi aholidan Toshkent shahar hokimligiga murojaat kelib tushgan. Unga ko‘ra, ko‘p qavatli uyning birinchi qavatida joylashgan “Yalpiz” restorani o‘z faoliyati bilan shu uy aholisiga qator noqulayliklar keltirishi aytilgan.

Xususan, restoranning uy hovlisida joylashgan xo‘jalik qurilmasida restoran rahbariyati tomonidan oshxona tashkil qilinib, restoran dudbo‘ronlari, konditsionerlar qatorida taomlarni tayyorlash uchun issiqlik uskunalari, shu jumladan, mangal o‘rnatilgani, mangal ko‘mirda yoqilishi va bu ko‘p qavatli uy uchun yong‘in xavfini keltirib chiqarishi vaj qilingan.

Shuningdek, bevosita aholi derazalariga yaqin joylashgan dudbo‘ronlardan chiqayotgan shovqin va qovurilgan taomlarning hidi, aholi uchun katta noqulaylik tug‘dirishi aytilgan. Bundan tashqari, restoran xodimlari tomonidan uy hovlisida chiqindilar tashlab ketilishi keltirilgan.

Ushbu holat Toshkent shahar hokimligining nazoratiga olindi va Sanitariya-epidemiologik osoyishtalik va jamoat salomatligi qo‘mitasining Toshkent shahar boshqarmasi yordamida tegishli o‘rganish va tekshiruvlar olib borilgan.

Natijada 25-noyabr kuni umumiy ovqatlanish maskanining rahbariyati tomonidan faoliyatda qator kamchiliklarga yo‘l qo‘yilgani aniqlanib, ularni belgilangan muddat ichida bartaraf etish majburiyati yuklangan. Shu jumladan, Shota Rustaveli ko‘chasi, 59-uy hovlisida joylashgan uskunalarni boshqa, aholiga noqulaylik tug‘dirmaydigan joyga ko‘chirish belgilangan va restoranning faoliyati kamchiliklar bartaraf etilishiga qadar to‘xtatilgan.

“Gazeta.uz”ning restoran vakillariga tayanib yozishicha, Shota Rustaveli ko‘chasidagi oshxona 3−4 kunga “taʼmirlash ishlari uchun” yopilgan. Mirobod ko‘chasi 5-uyda (Kosmonavtlar metro bekati yaqinida) joylashgan filiali ham hozirda yopiq bo‘lib, 1−2 kunda ochilishi kutilmoqda.