“Bemorlarning 10-15 foizida qizamiqqa gumon bor”. Namangandagi yuqumli kasalliklar shifoxonasidan reportaj

Ijtimoiy tarmoqlarda Namanganda qizamiq kasalligi avj olgani, shu tufayli kasalxonalarda joy yetishmayotgani haqidagi xabarlar tarqaldi. “Daryo” muxbiri Azizbek Abduvaliyev vaziyatga oydinlik kiritish maqsadida viloyat yuqumli kasalliklar shifoxonasida bo‘ldi.

Shifoxona 240 o‘ringa mo‘ljallangan bo‘lib, bugungi kunda bu yerda 235 nafar bemor davolanmoqda. Ular orasida qizamiqdan tashqari o‘tkir respirator kasalliklar, meningit, OIV, saramas va diareya kabi xastalikka chalinganlar ham bor.

Bu yerga olib kelinayotgan bemorlarning 10-15 foizini qizamiqqa gumon qilinganlar tashkil etyapti. Ularga laboratoriya tahlillaridan keyingina bu tashxisni aniq qo‘yish mumkin. Chunki alomatlari o‘xshash bo‘lsa-da, boshqa allergik kasalliklar ham bo‘lishi mumkin. Bemorlarni qabul qilish uchun joylarimiz va dori-darmonlarimiz yetarli, — deydi shifoxona bosh shifokori Ilhomjon Tojiboyev.

Kasalxona palatalarini bosh shifokor bilan aylanganimizda chindan ham bolasini joylashtirish uchun navbat kutayotganlar yoki bu yerdagi sharoitdan shikoyat qilganlarga duch kelmadik. Ular joylashgan palatalarda harorat maromida, dori-darmonlar imkon qadar shifoxona hisobidan berilmoqda.

Ikki nafar farzandim bor, ikkovining ham tobi qochdi, harorati ko‘tarildi. Biz avvaliga gripp deb o‘yladik. Keyinchalik kattasida bu shamollash bilan bog‘liq ekanligi maʼlum bo‘ldi, kichigida esa qizamiq aniqlandi. Bolamni bu yerga olib kelganimda holati yomon edi, hamma joyiga toshmalar toshib ketgandi. Hozir ancha yaxshimiz, tez orada javob berishsa kerak, — deydi bemor bolaning onasi Nilufar Ubaydullayeva.

Qizamiqqa chalinganlar orasida kichik yoshdagi bolalar ko‘p. Buni rasmiy statistika ham tasdiqlamoqda: viloyatdagi 255 nafar bemordan 62 foizini 1 yoshgacha, qolganlarini esa 1 dan 3 yoshgacha bo‘lgan bolalar tashkil etmoqda.

Jahon sog‘liqni saqlash tashkiloti va Sog‘liqni saqlash vazirligi tasdiqlagan emlash taqvimi mavjud, unga asosan bolalar 1 va 6 yoshda qizamiqqa qarshi emlanishi kerak. Shuning uchun ota-onalardan bolalarini emlatishga befarq bo‘lmaslikni so‘ragan bo‘lardim.Chunki kasallar asosan yo emlash yoshigacha bo‘lganlar yoki emlanmaganlar bo‘lib chiqyapti. Yana bunday kasallik avj olgan paytda omma ko‘p bo‘ladigan joylarga bormaslik, ko‘p suyuqlik ichish va gigiyenaga rioya etishni ham, — Ilhomjon Tojiboyev.

Maʼlumot uchun, joriy yilning 10 oyi davomida viloyatda jami 735 ta qizamiq kasalligi laboratoriya tekshiruvida tasdiqlangan. Viloyat yuqumli kasalliklar shifoxonasidan tashqari Beshkapadagi bolalar sihatgohida ham 100 ta zaxira o‘rni tayyorlab qo‘yilgan.