“Толибон” тактик ядро қуролига эга бўлиш йўлларини ўрганмоқда — собиқ разведка раҳбари

Афғонистоннинг собиқ миллий хавфсизлик хизмати бошлиғи Раҳматулла Набиль “Толибон” тактик ядро қуролига эга бўлиш йўлларини ўрганаётганини айтди. Бу ҳақда Ааmaj News хабар берди.

Собиқ амалдор Душанбеда бўлиб ўтаётган Ҳирот хавфсизлик йиғилишида шундай баёнот берган.

Менда “Толибон” гуруҳи тактик ядро қуролига эга бўлиш йўлларини текшираётгани ҳақида хабарлар бор, — деган у.

Набилнинг қўшимча қилишича, “Толибон” бу қуролларни Покистондан олиши ёки уларни қўлга киритиш учун муҳандисларга пул тўлаши мумкин. Афғонистон муваққат ҳукумати ҳозирча мазкур баёнотга ҳеч қандай муносабат билдирмаган.

• 27 ноябрь куни Тожикистон пойтахтида “Толибон” ҳукуматига қарши шахслар, экспертлар ва сиёсатчилар иштирокида Ҳирот хавфсизлик анжуманига старт берилди. Ушбу анжуман икки кун давом этади, унда иштирокчилар Афғонистондаги вазият ҳақида сўз юритади.