O‘zbekistonda xorijdan kelgan fuqarolardan qizamiq kasalligi yuqish holatlari aniqlanmoqda. Bu haqda Sanitariya-epidemiologiya qo‘mitasi axborot xizmati xabar berdi.
Unga ko‘ra, Jahon sog‘liqni saqlash tashkiloti maʼlumotlariga ko‘ra emlashdan bosh tortganlar hisobiga, 2023-yilda dunyoda va Yevropa mintaqasida qizamiq bo‘yicha epidemiologik vaziyat keskinlashdi. Ayni paytda Ukrainada 23 070, Serbiyada 4 954, Fransiyada 2 576 , Gretsiyada 2 476, Italiyada 2 020, Rossiyada 1 396, Gruziyada 1 128 holatda qizamiq kasalligi qayd etilgan.
Qo‘shni mamlakatlar: Afg‘onistonda 2023-yilning hozirgacha bo‘lgan davrida 2 105 holatda, Tojikistonda esa 300 dan ortiq, Qozog‘istonda 169 ta holat qayd etilgan. Respublikada joriy yilning iyul oyi holatiga ko‘ra, qizamiq kasalligiga shubha qilingan 306 nafar bemorning qon namunalari virusologik laboratoriyaga yuborilgan. Ulardan 164 tasida qizamiq aniqlangan.
Mamlakatda qizamiq bilan kasallanish holatlari asosan xorijdan kelgan qizamiq bilan kasallanganlar bilan aloqada bo‘lgan fuqarolar orasida aniqlanmoqda. Hozirda mamlakatda qizamiq bo‘yicha epidemiologik vaziyat nazorat ostida bo‘lib, ushbu kasallikka shubha qilingan shaxslar bilan aloqada bo‘lganlar epidemiologik ko‘rsatma asosida profilaktik emlash bilan qamrab olinmoqda.
Qizamiq kasalligi bo‘yicha murakkab epidemik vaziyatning oldini olish maqsadida O‘zbekistonda 2022-yilning 16-noyabr—30-dekabr kunlari 6 oylikdan 5 yoshgacha bo‘lgan bolalarda qizamiq-qizilchaga qarshi ommaviy emlashlar o‘tkazilgan. Natijada rejadagi 3 355 900 nafar bolaning 3 303 582 nafari yoki 98,4 foizi emlash bilan qamrab olingan va hozirda ham emlash ishlari davom ettirilmoqda.
Izoh (0)