AQSH prezidenti Jo Bayden Birlashgan Millatlar Tashkilotining iqlim bo‘yicha sammitida (COP28) qatnashmaydi. Bu haqda The New York Times Oq uydagi manbaga tayanib xabar berdi. Nashr yozishicha, sammitda Britaniya qiroli Charlz III, Rim papasi Fransisk hamda 200 ga yaqin davlat rahbarlari ishtirok etadi.
Baydenning sammitda ishtirok etmasligi sababi aytilmagan. Taxminlarga ko‘ra, u Isroil va HAMAS o‘rtasidagi urush mavzusi bilan ovora. Xususan, Baydenning iqlim o‘zgarishi bo‘yicha maxsus vakili Jon Kerri o‘tgan hafta prezidentning sammit rejalari haqidagi savolga javob berar ekan: “Yaqin Sharqda va Ukrainada urush, ko‘p ishlar sodir bo‘lyapti”.
NYT aniqlik kiritishicha, vitse-prezident Kamala Harris ham COP28 da qatnashmoqchi emas. Hozircha faqat Kerri va uning jamoasi sammitga borishi aniq.
Bayden prezidentligi davrida o‘tkazilgan avvalgi ikki sammitda qatnashgan. 2021-yilda tadbir Shotlandiyada, o‘tgan yili Misrda bo‘lib o‘tdi. Bu yilgi COP28 Dubayda (BAA) 30-noyabrdan 12-dekabrgacha o‘tkaziladi.
Iqlim kun tartibi Baydenning muhim siyosat mavzularidan biridir. Xususan, u AQSH tarixidagi birinchi Milliy iqlim bo‘yicha ishchi guruhini tuzgan. Uning vazifalari orasida:
- 2030-yilgacha mamlakatda issiqxona gazlari chiqindilarini 2005-yildagi darajadan 50 foizga kamaytirish;
- 2035-yilgacha atrof-muhitni karbonat angidrid bilan ifloslantirmaydigan elektr energiyasiga o‘tish;
- 2050-yilga kelib zaharli gaz ajralishini nolga tenglashtirish;
- federal iqlim va toza energiya investitsiyalarining 40 foizini kam daromadli guruhlarga bag‘ishlash.
Fevral oyida Bayden global isishni “insoniyat uchun yadroviy quroldan ham yomon ekzistensial tahdid” deb bilishini aytgan.
Izoh (0)