Навоий ва Бухоро шаҳарларида қалбаки акциз маркали алкоголь маҳсулотларининг муомалага киритилишига чек қўйилди, деб хабар беради Бош прокуратура ҳузуридаги департамент.
Қайд этилишича, департаментнинг Навоий вилоят бошқармаси, ИИБ ва божхона бошқармаси ходимлари ҳамкорлигида тезкор тадбир ўтказилган. Тадбирда Навоий шаҳрида фаолият юритувчи “Р.Б.” савдо ишлаб чиқариш корхонасига қарашли савдо дўкони ва омборхонасида 19 хил турдаги жами 9 326 дона умумий баҳоси 466,3 миллион сўмлик қалбаки акциз маркали алкоголь маҳсулотлари сотиш учун тайёрлаб қўйилгани аниқланиб, ушбу маҳсулотлар ашёвий далил сифатида олинган.
Шу каби, департаментнинг Бухоро шаҳар бўлими томонидан ўтказилган тезкор тадбирда фуқаро С.Ш. Халқлар дўстлиги кўчасидаги фуқаро А.Б.нинг хонадони омборхонасини ижарага олиб, ушбу омборхонада жами 6 800 дона умумий баҳоси 133,2 миллион сўмлик қалбаки акциз маркали алкоголь маҳсулотини сотиш мақсадида сақлаб келаётгани аниқланган.
Мазкур ҳолатлар юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) ва 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Қорақалпоғистон Республикаси ва Фарғона вилоятида қалбаки акциз маркали алкоголь маҳсулотларини муомалага киритилишининг олди олингани тўғрисида хабар берилганди.
Изоҳ (0)