Toshkent viloyatida prezident tashabbusi bilan boshlangan “Yashil makon” loyihasi bo‘yicha navbatdagi ko‘chat ekish tadbiri bo‘lib o‘tdi. Mazkur tadbirda ko‘rinish bergan viloyat hokimi Zoir Mirzayev vaqtincha fotograf vazifasini bajarib, hokimlik axborot xizmati mas’ullarining ko‘chat ekishini ham suratga oldi.
Viloyatda davom etgan “Yashil makon”ning navbatdagi manzili Nurafshon shahrida joylashgan Nurafshon Business City hududi bo‘ldi.
Tadbir avvalida jonliq so‘yilib, yurt obodligi, viloyat farovonligi yo‘lida qur’on tilovat qilindi. Toshkent viloyati hokimi Zoir Mirzayev boshchiligida, boshqarma va tashkilot rahbarlari, tuman va shahar hokimliklari mutasaddilari, nuroniylar, yoshlar, keng jamoatchilik hamda ommaviy axborot vositalari vakillari daraxt ekish jarayonlarida faol qatnashdi.
Ta’kidlanishicha, Nurafshon shahridagi bog‘ hududida 25 gektar bo‘sh yer maydoni mavjud bo‘lib, hozirga qadar bu yerda 6780 ta manzarali daraxt ko‘chati o‘tqazilgan. Yaqin yillar ichida yana 20 ming ko‘chat ekish rejalashtirilgan.
Bugungi ko‘chat o‘tqazish ishlarida dub, katalpa, yasin, oq qayin, lola daraxti, qirim qarag‘ay, chinor kabi 328 ta manzarali daraxt ko‘chatlari o‘tqazildi. Madaniyat sohasi xodimlari tomonidan jonli ijrodagi kuy va qo‘shiqlar jarayondagi katta-yu kichikka ko‘tarinki kayfiyat ulashdi, — deydi hokimlik axborot xizmati rahbari Behzod Qobulov.
Viloyat rahbari Zoir Mirzayevning jurnalistlarga ma’lumot berishicha, viloyatda barcha soha xodimlari — jurnalistlar, IIB xodimlari, prokuratura, qishloq xo‘jaligi xodimlari uchun maxsus bog‘lar tashkil etilgan bo‘lib, barcha kasb egalari ko‘chat ekish ishlarida faollik ko‘rsatmoqda.
Izoh (0)