Rossiya tomoni Armaniston sotib olgan, lekin hech qachon yetkazib berilmagan qurollar evaziga Armaniston qarzining bir qismidan kechishi mumkin. Bu haqda Armaniston bosh vaziri Nikol Pashinyanga tayanib, News.am xabar berdi.
Pashinyanning so‘zlariga ko‘ra, Yerevan Moskvaga hech qachon olmagan qurol-yarog‘ yetkazib berish uchun “millionlab dollar” to‘lagan.
“Variantlardan biri Armaniston Rossiyaga to'lashi kerak bo‘lgan qarzni kamaytirish bo'lishi mumkin. Bu yagona variant emas. Ammo biz Rossiyaning o‘ziga qurol kerakligini tushunamiz va bu yo‘nalishda ishlashga tayyormiz”, — dedi bosh vazir.
Rossiya Armanistonga to‘langan qurol-yarog‘ni yetkazib bermagani haqida may oyida Armaniston Xavfsizlik kengashi kotibi Armen Grigoryan eʼlon qilgandi.
Sentyabr oyida u buyurtmaning qiymati “yuz million dollar” bo‘ladimi degan savolga ijobiy javob bergan. Rossiya Mudofaa vazirligi so‘nggi yillarda Yerevan bilan tuzilgan shartnomalar haqida xabar bermadi.
Armanistonning “Joghovurd” gazetasi manbalariga ko‘ra, gap Armaniston Mudofaa vazirligi va Rossiyaning “Smerch” tipidagi raketalarni ishlab chiqaruvchi “NPO Splav” zavodi o‘rtasida tuzilgan shartnoma haqida ketmoqda.
Shu bilan birga, manbalarning aniqlik kiritishicha, Ukrainada urush boshlanishidan oldin ham zavod Armaniston Mudofaa vazirligiga tayyor mahsulotlarni olib ketish iltimosi bilan bir necha bor murojaat qilgan.
Izoh (0)