Toshkent shahrining Olmazor tumani hokimligida bo‘lib o‘tgan yig‘ilishda mahalla raisi yiqilib tushib vafot etdi. Bu haqda “Daryo”ga xabar bergan manbaga ko‘ra, hokimiyat mas’ullarining 40 kundan beri davom etayotgan majlisbozligi bir inson o‘limiga sababchi bo‘lgan.
Olmazor tumanida 15-oktyabrdan beri har kuni yig‘ilish o‘tkazilyapti. 40 kundan beri ertalab 07:30 dan 08:30 ga qadar, ba’zan undan ham ko‘proq davom etayotgan yig‘ilish ishchilarning haq-huquqini poymol qilmoqda, — deydi yig‘ishda qatnashib, rais o‘limiga guvoh bo‘lgan manba.
Manbaga ko‘ra, bugun, 24-noyabr kuni davom etgan navbatdagi majlis paytida, soat taxminan 10:00 larda “Yangi Sebzor” mahalla fuqarolar yig‘ini raisi yiqilib tushib, voqea joyida vafot etgan.
Bu majlisbozlik qachon tugaydi? Har kun bir soatlab ko‘chada sovuqda turyapmiz, — deydi u.
Voqea haqida xabar bergan manba shaxsi sir qolishini so‘radi.
Surxondaryodagi maktab direktoriga o‘xshab ketishni xohlamayman. Lekin majlisbozlik jondan o‘tkazib yuboryapti, — deydi bu haqida gapirgan manba.
Manbaning aniqlashtirishicha, vafot etgan rais Shavkat Murodbekov ismli fuqaro bo‘lgan.
Olmazor tumani hokimligi axborot xizmati rahbari Vitaliy Tolibjonov voqeani tasdiqladi. Ammo qo‘shimcha ma’lumot berolmasligini, ish yuzasidan prokuraturadan axborot olish mumkinligini aytdi.
Bosh prokuratura axborot xizmati “Daryo”ning bu haqidagi so‘roviga javoban tez orada axborot berilishini bildirdi.
Izoh (0)