Oliy Majlis Senatining navbatdagi yalpi majlisida “Tuproqni muhofaza qilish va uning unumdorligini oshirish to‘g‘risida”gi qonun loyihasi muhokama qilindi.
Tanzila Norboyeva mazkur qonun loyihasi haqida fikr bildirar ekan, O‘zbekistonda o‘ttiz yilda tuproq unumdorligida faqat pasayish kuzatilayotganini ta’kidladi.
“Masalan, 1991-yilda — 58 ball, 2001-yilda — 55 ball, 2011-yilda — 53,9 ball, 2021-yilda — 53,7 ballga pasaygan. Sug‘oriladigan yerlarimizning yarmidan ko‘pi, yaʼni 53 foizi sho‘rlangan.
Oqibatda keyingi yillarda hududlarimizda qurg‘oqchilik, qum va chang bo‘ronlari, hatto poytaxtda ham tez-tez kuzatilmoqda. Bu hol hosildorlikka, biologik xilma-xillikka va eng muhimi, aholi salomatligiga salbiy taʼsir qilmoqda.
Shu nuqtayi nazardan qaraganda, mazkur qonun mamlakatimizda tuproq muhofazasi va uning unumdorligini oshirishda mustahakam huquqiy poydevor vazifasini bajaradi”, — dedi Senat raisi.
Muhokamalardan so‘ng qonun loyihasi senatorlar tomonidan maʼqullandi.
Eslatib o‘tamiz, prezident Shavkat Mirziyoyev Samarqand shahrida bo‘lib o‘tgan BMTning Cho‘llanishga qarshi kurash to‘g‘risidagi konvensiyasi bajarilishini ko‘rib chiqish qo‘mitasining 21-sessiyasida qum va chang bo‘ronlari bo‘yicha Samarqand deklaratsiyasini qabul qilish tashabbusini ilgari surgan edi.
Izoh (0)