Тошкент шаҳрининг Олмазор тумани ҳокимлигида бўлиб ўтган йиғилишда маҳалла раиси йиқилиб тушиб вафот этди. Бу ҳақда “Дарё”га хабар берган манбага кўра, ҳокимият масъулларининг 40 кундан бери давом этаётган мажлисбозлиги бир инсон ўлимига сабабчи бўлган.
Олмазор туманида 15 октябрдан бери ҳар куни йиғилиш ўтказиляпти. 40 кундан бери эрталаб 07:30 дан 08:30 га қадар, баъзан ундан ҳам кўпроқ давом этаётган йиғилиш ишчиларнинг ҳақ-ҳуқуқини поймол қилмоқда, — дейди йиғишда қатнашиб, раис ўлимига гувоҳ бўлган манба.
Манбага кўра, бугун, 24 ноябрь куни давом этган навбатдаги мажлис пайтида, соат тахминан 10:00 ларда “Янги Себзор” маҳалла фуқаролар йиғини раиси йиқилиб тушиб, воқеа жойида вафот этган.
Бу мажлисбозлик қачон тугайди? Ҳар кун бир соатлаб кўчада совуқда туряпмиз, — дейди у.
Воқеа ҳақида хабар берган манба шахси сир қолишини сўради.
Сурхондарёдаги мактаб директорига ўхшаб кетишни хоҳламайман. Лекин мажлисбозлик жондан ўтказиб юборяпти, — дейди бу ҳақида гапирган манба.
Манбанинг аниқлаштиришича, вафот этган раис Шавкат Муродбеков исмли фуқаро бўлган.
Олмазор тумани ҳокимлиги ахборот хизмати раҳбари Виталий Толибжонов воқеани тасдиқлади. Аммо қўшимча маълумот беролмаслигини, иш юзасидан прокуратурадан ахборот олиш мумкинлигини айтди.
Бош прокуратура ахборот хизмати “Дарё”нинг бу ҳақидаги сўровига жавобан тез орада ахборот берилишини билдирди.
Изоҳ (0)