Ushbu maqolada Payme frontend dasturchilar jamoasi rahbari Timur Shamsutdinov Frontend va Backend dasturlashning farqi, mahsulotlarni yaratishda UX va UI dizaynning o‘rni hamda freymvorklarning muhim roli haqida so‘zlab beradi. Shuningdek, IT yo‘nalishiga endi qadam qo‘ygan yoshlar uchun foydali maslahatlar bilan bo‘lishadi.
Salon va motor
Mendan Frontend dasturlash Backend dasturlashdan nimasi bilan farq qiladi, deb so‘rashsa, men quyidagi misolni keltiraman.
Shinam bir avtomobilni tasavvur qiling. Siz unga o‘tirganingizda salonni chiroqlar yoritib turadi, yumshoq charm o‘rindiqlar qulaylik va yengillik hisini bag‘ishlaydi. Oldingizda asbob-uskuna paneli, unda esa ko‘plab regulyator va monitorlar mavjud. Siz avtomobilning barcha imkoniyatlarini oson va intuitiv ravishda o‘zlashtirib olasiz. Xuddi shu kabi, Frontent dasturlash ham sayt va ilovalarning biz ko‘ra va seza oladigan qismlarini ifodalaydi.
Kalitni mashinaning o‘t oldirish moslamasiga qo‘yganingizda “Backend” ishga tushadi. Frontend unga signal yuborgach, shu zahoti motor ovozini eshitasiz. Backend dasturchi ushbu motorni, turli mexanizmlarni, elektr komponentlarni va boshqa muhim qismlarni yaratgan injener-maxanikka o‘xshaydi.
Frontend va Backend dasturlashning ikki asosiy komponentlari, ikkisi ham sifatli mahsulot yaratish uchun muhim hisoblanadi.
UI va UX dizayn o‘rni
UI va UX dizayn dasturlashgacha bajariladigan muhim jarayon. U ba’zan Frontend’ga o‘z qoidalari va trendlarini buyurib turadi, ba’zida esa Frontend o‘z texnik qoidalarini o‘rnatadi va dizaynni to‘g‘ri tashkil etishni mutaxassislarga o‘rgatadi.
UI tashqi ko‘rinish va interfeysni bezatish uchun, UX esa mahsulotning qulayligi uchun javob beradi. Yaxshi loyihalangan UI/UX ilova yoki saytning samara va jozibadorligini oshiradi.
UI/UX mutaxassislar foydalanuvchilarning ehtiyojlarini inobatga olishlari, ular haqidagi ma’lumotlarni tahlil qilishlari, interfeysni sinovdan o‘tkazishlari va uni doimiy ravishda takomillashtirib borishlari kerak. Shuningdek, dizayndagi oxirgi trendlar va Frontend dasturlash texnologiyalaridan xabardor bo‘lish talab etiladi.
Freymvorklar – eng muhimi
Freymvorklar – bu zamonaviy dasturiy ta’minotdagi tenggi yo‘q vosita. Ular loyihalarni yaratish jarayonini osonlashtirish va dasturchilarga murakkabroq qarorlarga bor e’tiborini qaratishga yordam beradi.
Tasavvur qiling, siz “freymvorksiz” uy qurmoqchisiz. Buning uchun siz har bir g‘ishtni qo‘lda yaratishingiz, so‘ng ularni birin-ketin taxlashingiz kerak bo‘lardi. Bu ko‘p vaqt va harakatni talab etadi, biroq samarali natijani hech kim kafolatlamaydi.
Payme’da biz eng so‘nggi texnologik trendlardan xabardor bo‘lish va dasturlash uchun eng zamonaviy freymvorklardan foydalanishga intilamiz. Bizning asosiy instrumentlarimiz – Angular, React, Angular Material va Bootstrap.
Biroq hozir qiziqarli trend – dasturlashning unifikatsiyalanishi guvohiga aylanmoqdamiz. Bu yerda Flutter katta sahnaga chiqadi. Ushbu freymvork kodni bir marta yozib, uchta platforma: Web, Android va iOS uchun ilovalarga ega bo‘lish imkonini beradi. Bu juda qulay hamda ko‘p vaqtni, resurslarni tejaydi.
Yosh Frontend dasturchilarga maslahat
Hamisha o‘qib-o‘rganishga, yangi texnologiyalarni o‘zlashtirishga intiling, biroq ularni qo‘llashda ehtiyot bo‘ling. Yangi tillar va freymvorklar o‘zgaruvchan bo‘ladi va moslashuv uchun vaqt talab qiladi. Yangi texnologiyalarni to‘liq joriy qilishdan oldin loyihangiz uchun ularning qanchalik foydali ekanligiga baho bering. O‘zgarishlarga tayyor bo‘ling va tez yangilanuvchan IT dunyosiga moslashish uchun ko‘nikmalaringizni takomillashtirib boring.
Reklama huquqi asosida.
Izoh (0)