Ostona sudi sobiq deputat, ro‘yxatdan o‘tmagan “El-Tiregi” partiyasi yetakchisi Nurjan Altayevni davlat xizmatida lavozim egallash huquqidan umrbod mahrum qilish bilan 10 yilga ozodlikdan mahrum qildi. Bu haqda The Village xabar berdi.
Nurjan Altayev juda katta miqdorda pora olganlikda aybdor deb topildi. U unga nisbatan qo‘zg‘atilgan jinoyat ishini “siyosiy buyurtma” deb ataydi va ayblovlarni tan olmaydi.
“Men siyosatchiman va siyosiy faoliyat bilan shug‘ullanaman. Hokimiyatni tanqid qildim, shuning uchun ular meni qamoqqa tashlashga qaror qildi”, — dedi Altayev sudda.
Sud hukmiga ko‘ra, Altayev jazoni umumiy rejimdagi koloniyada o‘tashi kerak. Sud undan pora sifatida ko‘rsatilgan 50 million 116 ming 20 tengeni “noqonuniy yo‘l bilan orttirilgan mulk sifatida” undirishga qaror qildi. Sobiq deputat ishi yopiq eshiklar ortida o‘tdi. Hukm qonuniy kuchga kirmagan.
Nurjan Altayev 2019-yilning fevralidan 2020-yilning noyabrigacha “Nur Otan” (hozirgi “Amanat”) partiyasidan parlament deputati bo‘lgan. Uch yil oldin u muxolifat partiyasini yaratish rejasini e’lon qilgan edi. Altayev “Nur Otan”dan chiqarib yuborilib, deputatlik mansabidan mahrum qilingan. Sobiq parlament aʼzosi bir necha bor rasmiylarni “El-Tiregi”ni ro‘yxatdan o‘tkazishga to‘sqinlik qilganlikda ayblagan.
Izoh (0)