Qirg‘izistonda deputat va qishloq xo‘jaligi vaziri o‘rtasida oziq-ovqat narxi bo‘yicha tortishuv sodir bo‘ldi. Siyosatchilar mamlakatda tuxum yetishtirish masalasiga ham to‘xtaldi. Bu haqda “Nur.kz” xabar berdi.
Qirg‘izistonda mahalliy “Ata-Jurt Qirg‘iziston” parlament fraksiyasi va “Mekenchil” deputatlar guruhining qo‘shma yig‘ilishi bo‘lib o‘tdi. Tadbirda deputatlardan biri Shayloobek Atazov Qirg‘iziston qishloq xo‘jaligi vaziriga boshqarma mahsulotlar narxini prognoz qila oladimi, degan savolni berdi.
“Vazirlik fermerlarga ‘Sizlar shuncha kartoshka, guruch, yog‘ ishlab chiqarasizlar, falon narxda olamiz’, deyishi mumkinmi, qirg‘izistonliklarga shunday kafolat bera olasizmi?” — aniqlik kiritdi Atazov.
Qishloq xo‘jaligi vaziri Askarbek Janibekov bu ishni qila olmasligini, chunki narxlar dunyodagi vaziyatga bog‘liqligini aytdi. Biroq uning so‘zlari deputatni qanoatlantirmadi.
“Ayta olmasangiz, nega vazirlikda o‘tiribsiz?” — dedi deputat.
“Hatto vazir bo‘lsangiz ham, buni ayta olmaysiz”, — deya javob qaytardi vazir.
Bunga javoban deputat vazirlik rahbari emas, deputat ekanini ta’kidladi.
“Menga bunday javob bermang! Vazir bo‘lish xayolimda ham yo‘q. Men deputatman!” — dedi Atazov.
So‘ngra deputat Qirg‘iziston Qishloq xo‘jaligi vazirligining maʼruzasiga eʼtibor qaratdi.
“Tuxum ishlab chiqaraman, deb ham aytdingiz, uni qanday ishlab chiqarasiz?” – savol berdi Atazov.
“Men tuxum ishlab chiqarmayman, ularni tovuq qo‘yadi”, — deb javob berdi Janibekov.
“Hisobotingizda shuncha tuxum ishlab chiqarganingizni aytdingiz. Qanday qilib?” — qarshi savol berdi deputat Atazov. Janibekov vaziyatni tushuntirishga qaror qildi.
“Parrandachilik xo‘jaliklarida tovuqlar sonining ko‘payishiga qarab tuxum sotib olinmoqda. Tuxum klasterini qo‘llab-quvvatlash uchun davlatdan budjetdan mablag‘ ajratilmoqda. Bizda 4 ta yirik va 20 dan ortiq o‘rta parrandachilik fermasi bor”, — deya tushuntirdi Qirg‘iziston qishloq xo‘jaligi vaziri.
Izoh (0)