Oliy Majlis Qonunchilik palatasidagi “Milliy tiklanish” demokratik partiyasi fraksiyasining yig‘ilishida “2024-yil uchun davlat budjeti to‘g‘risidagi qonun loyihasi ikkinchi o‘qishda muhokama qilindi. Bu haqda parlament quyi palatasi matbuot xizmati xabar berdi.
Qayd etilishicha, qizg‘in savol-javoblar davomida deputatlar yo‘l infratuzilmasi masalasiga ham alohida eʼtibor qaratgan. Ularning fikricha, bugungi kunda O‘zbekistonda 14 863 ta ko‘prik bor, shundan 32 foizi, yaʼni 4 834 tasi qoniqarsiz, 5-6 foizi esa yaroqsiz holatda. Joriy yilda prezident tomonidan avariya holatidagi ko‘priklarni tiklash bo‘yicha alohida qaror qabul qilingan va unda 2024, kelgusi yillarda davlat budjetidan zarur mablag‘larni ajratish belgilangan. Bu bo‘yicha alohida dastur qabul qilingan va unda kelgusi yilda 226 ta ko‘prikni tiklash ko‘rsatilgan.
Lekin 2024-yilgi budjetda 27 ta eski ko‘prikni taʼmirlashga pul ajratilishi belgilangan xolos. Fraksiya aʼzolari qolgan ko‘priklar qaysi mablag‘ hisobidan taʼmirlanadi, degan savol bilan mutasaddilarga murojaat qilgan. Mutasaddilar ko‘tarilgan barcha savollar yuzasidan batafsil tushuntirishlar bergan.
“Uzoq davom etgan savol-javoblardan so‘ng, qonun loyihasi deputatlar tomonidan qo‘llab-quvvatlandi”, — deyiladi xabarda.
May oyida O‘zbekistonda 2023—2027-yillar davomida 177 kilometr uzunlikdagi magistral va 1 947 kilometr uzunlikdagi mahalliy ahamiyatga ega yo‘llar ta’mirlanib, foydalanishga topshirilishi rejalashtirilgani ma’lum qilingan edi.
Izoh (0)