O‘zbekistonda 2023—2027-yillar davomida 177 kilometr uzunlikdagi magistral va 1 947 kilometr uzunlikdagi mahalliy ahamiyatga ega yo‘llar ta’mirlanib, foydalanishga topshirilishi rejalashtirilgan.
23-may kuni bo‘lib o‘tgan Oliy Majlis Qonunchilik palatasining navbatdagi majlisida qayd etilishicha, yo‘llar xalqaro moliya institutlari mablag‘lari hisobidan 920,9 mln dollarlik 5 ta loyiha amalga oshirilgan holda ta’mirlanadi.
Qayd etilishicha, 2017—2022-yillar davomida respublika va mahalliy budjetlar mablag‘lari hisobidan jami 80 531 kilometr avtomobil yo‘llarini qurish, rekonstruksiya qilish va ta’mirlash, shuningdek, 1 265 dona ko‘priklar va yo‘l o‘tkazgichlarni rekonstruksiya qilish va ta’mirlash ishlari amalga oshirildi.
O‘zbekistonning xalqaro transport koridorlari hisoblangan xalqaro ahamiyatdagi A-380 G‘uzor—Buxoro—Nukus—Beyneu avtomobil yo‘lining 195 kilometri, A-373 M-39 avtomobil yo‘li—Guliston—Bo‘ka—Angren—Qo‘qon va Andijon orqali—O‘sh avtomobil yo‘lining 140 kilometri, M-39 Olmaota—Bishkek—Toshkent—Termiz avtomobil yo‘lining 179 kilometri, M-37 Samarqand—Buxoro—Turkmanboshi avtomobil yo‘lining 71 kilometri, Qarshi—Shahrisabz yo‘nalishidagi avtomobil yo‘lining 21 km qismlari rekonstruksiya qilindi.
Izoh (0)