Олий Мажлис Қонунчилик палатасидаги “Миллий тикланиш” демократик партияси фракциясининг йиғилишида “2024 йил учун давлат бюджети тўғрисидаги қонун лойиҳаси иккинчи ўқишда муҳокама қилинди. Бу ҳақда парламент қуйи палатаси матбуот хизмати хабар берди.
Қайд этилишича, қизғин савол-жавоблар давомида депутатлар йўл инфратузилмаси масаласига ҳам алоҳида эътибор қаратган. Уларнинг фикрича, бугунги кунда Ўзбекистонда 14 863 та кўприк бор, шундан 32 фоизи, яъни 4 834 таси қониқарсиз, 5-6 фоизи эса яроқсиз ҳолатда. Жорий йилда президент томонидан авария ҳолатидаги кўприкларни тиклаш бўйича алоҳида қарор қабул қилинган ва унда 2024, келгуси йилларда давлат бюджетидан зарур маблағларни ажратиш белгиланган. Бу бўйича алоҳида дастур қабул қилинган ва унда келгуси йилда 226 та кўприкни тиклаш кўрсатилган.
Лекин 2024 йилги бюджетда 27 та эски кўприкни таъмирлашга пул ажратилиши белгиланган холос. Фракция аъзолари қолган кўприклар қайси маблағ ҳисобидан таъмирланади, деган савол билан мутасаддиларга мурожаат қилган. Мутасаддилар кўтарилган барча саволлар юзасидан батафсил тушунтиришлар берган.
“Узоқ давом этган савол-жавоблардан сўнг, қонун лойиҳаси депутатлар томонидан қўллаб-қувватланди”, — дейилади хабарда.
Май ойида Ўзбекистонда 2023—2027 йиллар давомида 177 километр узунликдаги магистрал ва 1 947 километр узунликдаги маҳаллий аҳамиятга эга йўллар таъмирланиб, фойдаланишга топширилиши режалаштирилгани маълум қилинган эди.
Изоҳ (0)