Rossiyada 2,3 mingdan ortiq ukrainalik asirlikda qolmoqda. Bu haqda Kiyevda Reintegratsiya vazirligida bo‘lib o‘tgan komissiya yig‘ilishida ma’lum qilindi.
Ukraina bosh vaziri o‘rinbosari Irina Vereshuk raisligida o‘tkazilgan komissiya ishi yakunlarida aytilgan ma’lumotlarga ko‘ra, ozodlikdan mahrum qilish fakti 4337 nafar kishi (3574 nafar harbiy va 763 nafar fuqaro)ga nisbatan aniqlangan — ulardan 1953 nafari asirlikdan ozod etilgan.
2022-yil 19-noyabrda tuzilgan komissiya tarkibiga 18 kishi (shundan 5 nafari jamoat tashkilotlari vakillari) kiradi. Bugungi kunga qadar komissiyaning 8 ta yig‘ilishi o‘tkazilgan. Ularning natijalariga ko‘ra, tegishli ma’lumotlar Rossiyaning Ukrainadagi harbiy harakatlari natijasida erkinlikdan mahrum qilinganlik fakti aniqlangan shaxslarning yagona reyestriga kiritiladi. Reyestr administratori Reintegratsiya vazirligi boshqaruviga kiruvchi Milliy axborot byurosi hisoblanadi.
Natijalarga ko‘ra, Reintegratsiya vazirligi bir martalik va yillik davlat pul yordamini to‘laydi. Shu tariqa, 2023-yil boshidan beri asirlikdan ozod qilingan odamlarga, shuningdek, harbiy asirlar, garovga olinganlar va siyosiy mahbuslarning oilalariga 422 million grivna (taxminan 11 million yevro) to‘langan.
Izoh (0)