Ukrainada rossiyalik harbiy asirlar uchun lagerlar tashkil etildi. Mamlakatda kamida 562 nafar asir bor

Ukraina bosh prokurori Irina Venediktovaning aytishicha, Ukrainada rossiyalik harbiy asirlar uchun lagerlar tashkil etilgan.

“Shunday lagerlar bor, chunki Jeneva konvensiyasi buni talab qiladi. Ularga hatto o‘zimizning yigitlar bilan deyarli bir xil darajada tibbiy yordam ko‘rsatilmoqda”, — dedi u BBC’ning Ukraina xizmatiga bergan intervyusida. Prokuror “deyarli bir xil darajada” degani nimani anglatishiga izoh bermagan.

“Men o‘ta ochiq bo‘lishimizni istayman. Biz xalqaro gumanitar huquq, milliy qonunchiligimiz doirasida ishladik va keyinchalik savollar tug‘diradigan birorta chegarani kesib o‘tmadik”, — ta’kidladi Venediktova.

19-mart holatiga ko‘ra, Ukrainada 562 nafar rossiyalik askar asirda, dedi Ukraina bosh vazirining o‘rinbosari Irina Vereshuk va bu ma’lumotlar to‘liq emasligini ta’kidladi. Uning so‘zlariga ko‘ra, mingga yaqin rossiyalik harbiylar asirga olingani haqida avval berilgan ma’lumotlar haqiqatga yaqin.

Ukraina prezidenti ofisi rahbarining maslahatchisi Aleksey Arestovich mart oyi boshida Ukrainada rossiyalik mahbuslar uchun lagerlar yaratish rejalari haqida gapirib, “endi ularni qo‘lga olingan sifatida yoki hibsda ushlab turishning iloji yo‘qligini” tushuntirgandi.