Oliy Majlis Senatida 16-noyabr kuni bo‘lib o‘tgan majlisda “Voyaga yetmaganlar o‘rtasida nazoratsizlik va huquqbuzarliklarning profilaktikasi to‘g‘risida”gi qonunning Samarqand viloyatidagi ijrosi muhokama qilindi.
Maʼlum qilinishicha, viloyatda joriy yilda 1 ming 345 ta “reyd” tadbiri o‘tkazilib, voyaga yetmagan bolalarni nazoratsiz qoldirgan 57 nafar shaxsga nisbatan maʼmuriy jazo qo‘llanilgan.
Senatning Yoshlar, madaniyat va sport masalalari qo‘mitasi tomonidan olib borilgan o‘rganishlar davomida amalga oshirilgan ishlar bilan birga voyaga yetmaganlar o‘rtasida nazoratsizlik va huquqbuzarliklar profilaktikasi borasida ayrim muammolar mavjudligi aniqlangan.
“Jumladan, viloyatda voyaga yetmaganlar tomonidan huquqbuzarliklar sodir etish holati yildan yilga ortib, 2021-yilda 1 ming 331 tani, 2022-yilda
3 ming 941 tani hamda 2023-yilning 8 oyi davomida esa 3 ming 128 tani tashkil etgan.
Voyaga yetmaganlar orasida sodir etilgan jinoyatlar soni ham ortgan. Xususan, 2022-yilning 8 oyi davomida jinoyatlar soni 92 tani tashkil qilgan bo‘lsa, joriy yilning mos davrida bu ko‘rsatkich 129 tani tashkil etib, 40 foizga ortganligini ko‘rsatmoqda.
Profilaktik tadbirlar davomida 39 nafar maktab o‘quvchisi pornografik, 58 nafari esa zo‘ravonlik yoki shafqatsizlikni targ‘ib etuvchi materiallar saqlagani aniqlangan. 2 ming 221 nafardan ortiq tarbiyasi og‘ir bo‘lgan bolalar bilan profilaktik suhbatlar olib borilib, 1 ming 853 nafar o‘quvchining ota-onasiga nisbatan maʼmuriy javobgarlik choralari qo‘llanilgan”, — deyiladi senat axborotida..
Qo‘shimcha qilinishicha, kriminogen vaziyat og‘ir deb belgilangan 76 ta taʼlim muassasasiga IIB rahbarlarining biriktirilganligidan maktablarning xabardor emasligi ushbu tizim amalda ishlamayotganligidan dalolat beradi.
O‘rganish davomida aksariyat taʼlim muassasalarida o‘quv mashg‘ulotlariga sababsiz hamda muntazam ravishda qatnashmayotgan voyaga yetmaganlar monitoringini olib borish yo‘lga qo‘yilmagani ham aniqlangan.
Ma'lumot uchun, O‘zbekistonda 2023-yilning sakkiz oyida 2 ming 121 nafar voyaga yetmaganlar tomonidan 2 ming 24 ta jinoyat sodir etilgan.
Avvalroq Oliy Majlis Senatining Yoshlar, madaniyat va sport masalalari qo‘mitasi majlisida “Voyaga yetmaganlarga nisbatan jinoiy javobgarlik yanada liberallashtirilishi munosabati bilan O‘zbekiston Respublikasining Jinoyat kodeksiga qo‘shimcha va o‘zgartirishlar kiritish to‘g‘risida”gi qonun muhokama qilingandi. Mazkur qonun bilan 18 yoshga to‘lguniga qadar sodir etgan o‘ta og‘ir bo‘lmagan jinoyati uchun jazoni o‘tab bo‘lgan shaxs sudlanmagan deb hisoblanishi belgilanmoqda.
Eslatib o‘tamiz, iyul oyida Shavkat Mirziyoyev ishtirokida bo‘lib o‘tgan IIV kengaytirilgan hay‘at yig‘ilishida yoshlar o‘rtasidagi jinoyatlarni kamaytirish bo‘yicha har bir hokim o‘zi o‘zgarish qilishi shartligi ko‘rsatib o‘tilgandi. Shuningdek, O‘zbekistonda yagona 112 tezkor raqami va dispetcherlik tizimi ishga tushirilishi, Yoshlar o‘rtasidagi jinoyatlarni kamaytirish bo‘yicha har bir hokim o‘zgarish qilishi shartligi ko‘rsatib o‘tilgandi. Shunga muvofiq Ichki ishlar vazirligi nazoratsiz va qarovsiz qolgan voyaga yetmaganlar ro‘yxatini shakllantiradi.
Izoh (0)