Олий Мажлис Сенатида 16 ноябрь куни бўлиб ўтган мажлисда “Вояга етмаганлар ўртасида назоратсизлик ва ҳуқуқбузарликларнинг профилактикаси тўғрисида”ги қонуннинг Самарқанд вилоятидаги ижроси муҳокама қилинди.
Маълум қилинишича, вилоятда жорий йилда 1 минг 345 та “рейд” тадбири ўтказилиб, вояга етмаган болаларни назоратсиз қолдирган 57 нафар шахсга нисбатан маъмурий жазо қўлланилган.
Сенатнинг Ёшлар, маданият ва спорт масалалари қўмитаси томонидан олиб борилган ўрганишлар давомида амалга оширилган ишлар билан бирга вояга етмаганлар ўртасида назоратсизлик ва ҳуқуқбузарликлар профилактикаси борасида айрим муаммолар мавжудлиги аниқланган.
“Жумладан, вилоятда вояга етмаганлар томонидан ҳуқуқбузарликлар содир этиш ҳолати йилдан йилга ортиб, 2021 йилда 1 минг 331 тани, 2022 йилда
3 минг 941 тани ҳамда 2023 йилнинг 8 ойи давомида эса 3 минг 128 тани ташкил этган.
Вояга етмаганлар орасида содир этилган жиноятлар сони ҳам ортган. Хусусан, 2022 йилнинг 8 ойи давомида жиноятлар сони 92 тани ташкил қилган бўлса, жорий йилнинг мос даврида бу кўрсаткич 129 тани ташкил этиб, 40 фоизга ортганлигини кўрсатмоқда.
Профилактик тадбирлар давомида 39 нафар мактаб ўқувчиси порнографик, 58 нафари эса зўравонлик ёки шафқатсизликни тарғиб этувчи материаллар сақлагани аниқланган. 2 минг 221 нафардан ортиқ тарбияси оғир бўлган болалар билан профилактик суҳбатлар олиб борилиб, 1 минг 853 нафар ўқувчининг ота-онасига нисбатан маъмурий жавобгарлик чоралари қўлланилган”, — дейилади сенат ахборотида.
Қўшимча қилинишича, криминоген вазият оғир деб белгиланган 76 та таълим муассасасига ИИБ раҳбарларининг бириктирилганлигидан мактабларнинг хабардор эмаслиги ушбу тизим амалда ишламаётганлигидан далолат беради.
Ўрганиш давомида аксарият таълим муассасаларида ўқув машғулотларига сабабсиз ҳамда мунтазам равишда қатнашмаётган вояга етмаганлар мониторингини олиб бориш йўлга қўйилмагани ҳам аниқланган.
Маълумот учун, Ўзбекистонда 2023 йилнинг саккиз ойида 2 минг 121 нафар вояга етмаганлар томонидан 2 минг 24 та жиноят содир этилган.
Аввалроқ Олий Мажлис Сенатининг Ёшлар, маданият ва спорт масалалари қўмитаси мажлисида “Вояга етмаганларга нисбатан жиноий жавобгарлик янада либераллаштирилиши муносабати билан Ўзбекистон Республикасининг Жиноят кодексига қўшимча ва ўзгартиришлар киритиш тўғрисида”ги қонун муҳокама қилинганди. Мазкур қонун билан 18 ёшга тўлгунига қадар содир этган ўта оғир бўлмаган жинояти учун жазони ўтаб бўлган шахс судланмаган деб ҳисобланиши белгиланмоқда.
Эслатиб ўтамиз, июль ойида Шавкат Мирзиёев иштирокида бўлиб ўтган ИИВ кенгайтирилган ҳайъат йиғилишида ёшлар ўртасидаги жиноятларни камайтириш бўйича ҳар бир ҳоким ўзи ўзгариш қилиши шартлиги кўрсатиб ўтилганди. Шунингдек, Ўзбекистонда ягона 112 тезкор рақами ва диспетчерлик тизими ишга туширилиши, Ёшлар ўртасидаги жиноятларни камайтириш бўйича ҳар бир ҳоким ўзгариш қилиши шартлиги кўрсатиб ўтилганди. Шунга мувофиқ Ички ишлар вазирлиги назоратсиз ва қаровсиз қолган вояга етмаганлар рўйхатини шакллантиради.
Изоҳ (0)