Birlashgan Arab Amirliklari G‘azo sektorida tinch aholi o‘limi bilan bog‘liq keskinlik kuchayganiga qaramay, Isroil bilan diplomatik aloqalarni davom ettirishni rejalashtirmoqda. Bu haqda Reuters agentligi to‘rtta manbaga tayanib xabar berdi.
Agentlik maʼlumotlariga ko‘ra, BAA hukumati “o‘z manfaatlarini himoya qilgan holda” Isroilning HAMAS bilan urushiga taʼsir o‘tkazishga umid qilmoqda. Manbalarga ko‘ra, BAA jangovar harakatlar tugaganidan keyin ham keng muloqot o‘rnatish imkoniyatini saqlab qolish uchun arab davlatlarining Isroilga nisbatan pozitsiyasini yumshatishni rejalashtirgan.
Manbalarning aniqlik kiritishicha, BAA Isroil bilan diplomatik munosabatlarni uzishni rejalashtirmayapti, biroq mojaro yanada avj oladigan bo‘lsa, buni amalga oshirishi mumkin. Ayni paytda Yaqin Sharq diplomatlaridan biri BAA Isroil bilan barqaror iqtisodiy va harbiy aloqalarini yo‘qotmoqchi emasligini ta’kidlagan.
16-oktabr kuni Isroil bosh vaziri Binyamin Netanyaxu mojaro boshlanganidan beri birinchi marta BAA prezidenti Shayx Muhammad bin Zoid Ol Nahayon bilan telefon orqali suhbatlashdi. Tomonlar mintaqadagi vaziyatni muhokama qildilar. Reuters agentligining qayd etishicha, Birlashgan Arab Amirliklari rasmiylari Isroilning G‘azodagi harakatlarini ochiqchasiga qoralab, zo‘ravonliklarni to‘xtatishga chaqirgan.
Izoh (0)