Ўзбекистонда 2024 йилда ҳукумат хусусий секторда ишловчи аёлларнинг ҳомиладорлик ва туғиш нафақалари миқдорини уч бараварга қисқартиришни режалаштирмоқда. Бу ҳақда келаси йилги давлат бюджети лойиҳасида маълум қилинди.
Қайд этилишича, 2023 йилги давлат бюджетидан хусусий сектордаги ҳомиладор аёлларга ҳомиладорлик ва туғиш нафақалари учун 300,7 миллиард сўм ажратилган. 2024 йилда эса бу кўрсаткич 100 миллиард сўмгача камаяди.
Олий Мажлис Қонунчилик палатаси депутати Дониёр Ғаниевнинг айтишича, молиячилар буни маблағларнинг паст даражада ўзлаштирилиши билан изоҳлаган. Жумладан, 2023 йилда режалаштирилган 300,7 миллиард сўмнинг атиги 50 миллиард сўми ўзлаштирилиши режалаштирилган бўлиб, шу боис келгуси йил учун прогноз 100 миллиард сўмга туширилган.
“Менимча, бу ерда нега пул ўзлаштириш камлигини ўрганиш керак. Тахминимча, хусусий секторда ишлайдиган аёлларнинг катта қисми меҳнат шартномасисиз ишлайди. Кейин бюрократия. Пулни олиш учун корхона бухгалтери топшириши керак бўлган ҳужжатлар бор, эриниб, шуни қилмаса керак”, — деб ёзди у Х (Twitter) даги саҳифасида.
Эслатиб ўтамиз, 2022 йил 1 сентябрдан Ўзбекистонда хусусий секторда ишлаётган аёлларга ҳам давлат томонидан ҳомиладорлик ва туғуруқ нафақалари тўланиши бошланган. Тўлов минимал истеъмол харажатларининг 4 баравари миқдори (2,27 миллион сўм)ни ташкил этади. Ўшанда бу мақсадлар учун, бюджетдан 2022 йилда 200 миллиард сўм, 2023 йилда эса 1,7 триллион сўм йўналтирилиши айтилганди.
Изоҳ (0)