Rossiya prezidenti Vladimir Putin Ukrainaga yuborilgan G‘arb qurollarining bir qismi noqonuniy qurol bozori orqali Yaqin Sharqqa va “Tolibon”ga sotilayotganini aytgandi. Afg‘oniston muvaqqat hukumati mazkur ayblovni rad etdi. Bu haqda TOLOnews xabar berdi.
“Tolibon” matbuot kotibi Zabihulloh Mujohid Rossiya prezidentining da’vosini rad etdi.
“Biz bu da’voni rad etamiz, u haqiqatga to‘g‘ri kelmaydi. Afg‘onistonga qurollar olib kelinmaydi va bu yerdan boshqa davlatga yuborilmaydi. G‘alabadan so‘ng Islom Amirligiga qoldirilgan qurol va jihozlarning hammasi xavfsiz”, — dedi Mujohid.
Biroq, ayrim ekspertlarning fikricha, Rossiya prezidentining mazkur bayonoti yuzasidan tekshiruv o‘tkazilishi kerak.
“Bu masala qo‘shimcha tekshiruvga muhtoj, qachonki bizda hujjatlar bo‘lsa, bu masala bo‘yicha izoh berishimiz mumkin. Ammo Ukrainadagi g‘arb qurollari turli xaridorlarga keng miqyosda sotilayotgani aniq”, — dedi TOLOnews telekanaliga harbiy tahlilchi Asadulla Nadim.
“Ukrainaning Afg‘oniston bilan chegarasi ham, yaxshi munosabatlari ham yo‘q. Shunday qilib, bunday voqea sodir bo‘lganda, yagona yo‘l Rossiyadan Markaziy Osiyo davlatlari orqali, keyin esa Afg‘onistonga borishdir”, — dedi yana bir harbiy tahlilchi Sarvar Niyoziy.
Izoh (0)