Shavkat Mirziyoyev 3-oktyabr kuni Ostonada bo‘lib o‘tayotgan Turkiy davlatlar tashkiloti sammitida Falastin—Isroil muammosining yagona va eng adolatli yechimini aytdi.
.jpg)
O‘zbekiston prezidenti bugungi kunda jahon miqyosida ishonch inqirozi tobora avj olayotganini, global xavfsizlikni ta’minlashda yangi muammolar yuzaga kelayotgani va xalqaro huquq me’yorlaridan chekinish holatlari kuchayayotganini qayd etdi.
“Ayniqsa, Yaqin Sharqda uzoq vaqtdan buyon davom etayotgan Falastin—Isroil muammosining nihoyatda xavfli tus olgani barchamizni jiddiy xavotirga solmoqda. Qurolli to‘qnashuvda tinch aholi, ayniqsa, keksalar, ayollar va bolalar orasida qurbonlar va jarohat olganlar soni keskin ortib, nizoning keng yoyilib ketish xavfi kuchaymoqda”, — dedi prezident.
Shavkat Mirziyoyev shu munosabat bilan tomonlarni zudlik bilan harbiy harakatlarga barham berib, o‘t ochishni to‘xtatishga, gumanitar maqsadlarda murosaga kelishga chaqirdi.
“Mazkur muammoning yagona va eng adolatli yechimi — nizoni "ikki xalq uchun ikki davlat" tamoyili asosida hal etishdir”, — dedi prezident.
Davlat rahbarining ta’kidlashicha, Falastin xalqi BMT rezolyutsiyalarida belgilanganidek, mustaqil davlat barpo etish huquqiga ega.
“Biz tashkilotimiz doirasida bu boradagi yakdil va qat’iy pozitsiyamizni butun dunyoga e’lon qilishimiz zarur”, — deb ta’kidladi Shavkat Mirziyoyev.
Izoh (0)