AQSH Kongressining Vakillar palatasi respublikachilarning Isroilga 14,3 milliard dollarlik yordam ko‘rsatish rejasini qabul qildi. Quyi palataning 226 a’zosi qonun loyihasini yoqlab, 196 nafari qarshi ovoz berdi, deb yozmoqda Reuters. Qonun loyihasida Ukrainaga mablag‘ ajratish haqida so‘z yuritilmagan.
Vakillar palatasi tomonidan tasdiqlangan yordam rejasi Isroil armiyasini qo‘llab-quvvatlashni o‘z ichiga oladi: jumladan, Isroilning “Temir gumbaz” va “Dovud quroli” havo mudofaa tizimlarini sotib olish uchun 4 milliard dollar, “Temir nur” tizimini rivojlantirish uchun 1,2 milliard dollar ajratish nazarda tutilgan.
Avvalroq AQSH prezidenti Jo Bayden agar qonunda Ukraina bo‘yicha xarajatlar bandi bo‘lmasa, unga veto qo‘yishini aytgandi. Senatdagi ko‘pchilik demokratlar yetakchisi Chak Shumer qonun loyihasini ovozga qo‘ymasligini ma’lum qilgan.
Eslatib o‘tamiz, Bayden Kongressdan Ukraina, Isroil, Tayvanga yordamni moliyalashtirish uchun 106 milliard dollar ajratishni, shuningdek, Meksika bilan chegarada himoya devori qurilishi uchun pul ajratishni so‘ragandi. Ushbu mablag‘larning katta qismi — 61,4 milliard dollar Ukrainani qo‘llab-quvvatlashga yo‘naltirilishi kerak.
Izoh (0)