АҚШ Конгрессининг Вакиллар палатаси республикачиларнинг Исроилга 14,3 миллиард долларлик ёрдам кўрсатиш режасини қабул қилди. Қуйи палатанинг 226 аъзоси қонун лойиҳасини ёқлаб, 196 нафари қарши овоз берди, деб ёзмоқда Reuters. Қонун лойиҳасида Украинага маблағ ажратиш ҳақида сўз юритилмаган.
Вакиллар палатаси томонидан тасдиқланган ёрдам режаси Исроил армиясини қўллаб-қувватлашни ўз ичига олади: жумладан, Исроилнинг “Темир гумбаз” ва “Довуд қуроли” ҳаво мудофаа тизимларини сотиб олиш учун 4 миллиард доллар, “Темир нур” тизимини ривожлантириш учун 1,2 миллиард доллар ажратиш назарда тутилган.
Аввалроқ АҚШ президенти Жо Байден агар қонунда Украина бўйича харажатлар банди бўлмаса, унга вето қўйишини айтганди. Сенатдаги кўпчилик демократлар етакчиси Чак Шумер қонун лойиҳасини овозга қўймаслигини маълум қилган.
Эслатиб ўтамиз, Байден Конгрессдан Украина, Исроил, Тайванга ёрдамни молиялаштириш учун 106 миллиард доллар ажратишни, шунингдек, Мексика билан чегарада ҳимоя девори қурилиши учун пул ажратишни сўраганди. Ушбу маблағларнинг катта қисми — 61,4 миллиард доллар Украинани қўллаб-қувватлашга йўналтирилиши керак.
Изоҳ (0)