Britaniyaning Collins ingliz tili izohli lug‘atini tuzuvchilar 2023-yil so‘zi sifatida “AI”ni tanladi.
AI — bu sun’iy intellektning inglizcha nomi qisqartmasi. Lug‘at sun’iy intellekt atamasiga “insonning aqliy jarayonlarini kompyuter dasturlari yordamida modellashtirish” deb ta’rif bergan.
Collins direktori Aleks Bikroftga ko‘ra, 2023-yilda eʼtibor markazida bo‘lgan sunʼiy intellektning jadal rivojlanishi tufayli AI yil so‘zi sifatida tanlangan. Kompaniya ma’lumotlariga ko‘ra, joriy yilda bu atama to‘rt barobar ko‘proq qo‘llana boshladi.
Collins’ning 2023-yil uchun eng asosiy so‘zlar ro‘yxatidan quyidagilar ham joy olgan:
- Deinfluencing — obunachilarni muayyan mahsulotlardan, turmush tarzidan va hokazolardan qochish zarurligi haqida ogohlantirish uchun ijtimoiy tarmoqlardan foydalanish;
- Nepo baby — ota-onasining muvaffaqiyati asosida mashhurlikka erishgan deb hisoblanuvchi shaxs;
- Canon event — inson shaxsini shakllantirishda muhim turtki bo‘lgan voqea;
- Greedflation — korxonalarning o‘z daromadlarini oshirish maqsadida inflyatsiyani bahona sifatida ishlatishi;
- Semaglutide — ishtahani va qondagi shakar darajasini pasaytirish uchun ishlatiladigan dori.
Collins ingliz lug‘ati 2022-yilda “permacrisis”, ya’ni doimiy inqirozni yil so‘zi deb tanlagandi.
Izoh (0)