Britaniya HAMASni xorijliklarni qo‘yib yuborishga chaqirdi

Britaniya tashqi ishlar vaziri Jeyms Kleverli HAMAS jangchilarini xorijiy fuqarolarga G‘azo sektorini tark etishga ruxsat berishga chaqirdi. Bu haqda u Twitter’da (X) yozgan.

Buyuk Britaniya tashqi ishlar vazirining qayd etishicha, Britaniya G‘azoga ko‘proq gumanitar yordam yetkazish maqsadida mintaqadagi jangovar harakatlarni to‘xtatish bo‘yicha muzokaralar olib borishga urinmoqda.

Shu bilan birga, u Britaniya fuqarolarining xavfsizligi hukumat uchun mutlaq ustuvor vazifa ekanini ta’kidladi.

“HAMAS chet el fuqarolariga G‘azoni tark etishiga ruxsat berishi kerak. Biz britaniyaliklar imkon qadar tezroq chiqib ketishini ta’minlash uchun Misr va Isroil bilan yaqindan hamkorlik qilmoqdamiz”, — dedi Kleverli.

Ma’lumot uchun Isroil tomonidan muntazam zarbaga uchrayotgan G‘azoda oziq-ovqat, yoqilg‘i, suv va tibbiy xizmat yetishmayapti. Falastinlik shifokorlar G‘azodagi shifoxonalardan aholini evakuatsiya qilishning iloji yo‘qligini ma’lum qildi. Avvalroq Falastin Qizil Yarim Oy jamiyati Isroil harbiylari G‘azodagi “Al-Quds”ni evakuatsiya qilishga buyruq berganini ma’lum qilgandi. Tashkilotning aytishicha, bemorlar reanimatsiya bo‘limida, chaqaloqlar esa inkubatorlarda, shuning uchun ularni ko‘chirish mumkin emas.