Британия ҲАМАСни хорижликларни қўйиб юборишга чақирди

Британия ташқи ишлар вазири Жеймс Клеверли ҲАМАС жангчиларини хорижий фуқароларга Ғазо секторини тарк этишга рухсат беришга чақирди. Бу ҳақда у Twitter’да (Х) ёзган.

Буюк Британия ташқи ишлар вазирининг қайд этишича, Британия Ғазога кўпроқ гуманитар ёрдам етказиш мақсадида минтақадаги жанговар ҳаракатларни тўхтатиш бўйича музокаралар олиб боришга уринмоқда.

Шу билан бирга, у Британия фуқароларининг хавфсизлиги ҳукумат учун мутлақ устувор вазифа эканини таъкидлади.

“ҲАМАС чет эл фуқароларига Ғазони тарк этишига рухсат бериши керак. Биз британияликлар имкон қадар тезроқ чиқиб кетишини таъминлаш учун Миср ва Исроил билан яқиндан ҳамкорлик қилмоқдамиз”, — деди Клеверли.

Маълумот учун Исроил томонидан мунтазам зарбага учраётган Ғазода озиқ-овқат, ёқилғи, сув ва тиббий хизмат етишмаяпти. Фаластинлик шифокорлар Ғазодаги шифохоналардан аҳолини эвакуация қилишнинг иложи йўқлигини маълум қилди. Аввалроқ Фаластин Қизил Ярим Ой жамияти Исроил ҳарбийлари Ғазодаги “Ал-Қудс”ни эвакуация қилишга буйруқ берганини маълум қилганди. Ташкилотнинг айтишича, беморлар реанимация бўлимида, чақалоқлар эса инкубаторларда, шунинг учун уларни кўчириш мумкин эмас.