29-oktyabr, yakshanba kuni Dog‘iston aeroportidagi tartibsizliklardan so‘ng Isroil tashqi ishlar vazirligi, shuningdek, mamlakat bosh vaziri Binyamin Netanyaxuning idorasi Rossiya hukumatini Rossiya hududidagi yahudiylar va isroilliklarni himoya qilish choralarini ko‘rishga chaqirdi.
“Isroil Rossiya huquq-tartibot idoralaridan qayerda bo‘lishidan qatʼi nazar, barcha Isroil fuqarolari va yahudiylarining xavfsizligini himoya qilishini hamda yahudiylar va isroilliklarga qarshi qaratilgan tartibsizliklar va yovvoyiliklarga qarshi qatʼiy harakat qilishini kutadi”, — deyiladi qo‘shma bayonotda.
Qayd etilishicha, Isroilning Moskvadagi elchixonasi yahudiylar va isroilliklarning xavfsizligini ta’minlash masalasida Rossiya rasmiylari bilan yaqindan hamkorlik qiladi. Hujjatda aytilishicha, Isroil davlati butun dunyo bo‘ylab Isroil fuqarolari va yahudiylariga zarar yetkazish urinishlariga katta tashvish bilan qaramoqda.
Maxachqal’a aeroportidagi tartibsizliklar
29-oktyabr kuni Federal havo transporti agentligi “noma’lum shaxslarning platformaga kirishi sababli” Maxachqal’a aeroporti uchadigan va qo‘nadigan reyslarga xizmat ko‘rsatish uchun vaqtincha yopilganini ma’lum qildi. Maxachqal’aga qo‘nishi kerak bo‘lgan samolyotlar muqobil aerodromlarga yo‘naltirildi.
Rusiyzabon Telegram kanallarida Falastin bayroqlarini ko‘targan olomon Maxachqal’a aeroportiga bostirib kirayotgani aks etgan foto va videolarni tarqatdi.
OAV maʼlumotlariga ko‘ra, 29-oktyabr kuni kechqurun Tel-Avivdan Red Wings aviakompaniyasining muntazam reysi kelishidan sal oldin aeroport yoniga bir necha yuz kishi yig‘ilgan. Olomon aeroportdan chiqayotgan mashinalarni to‘xtatib, reysda kelgan yahudiylarni topish uchun odamlarning pasportlarini tekshirishga kirishgan.
Namoyishchilarning bir qismi uchish-qo‘nish yo‘lagiga yugurib, Tel-Avivdan kelgan samolyotga chiqishga uringan. Voqea joyiga yetib kelgan politsiyachilar vaziyatni nazorat qila olmagan. Rossiya Tergov qo‘mitasining Dog‘iston bo‘yicha tergov boshqarmasi ommaviy tartibsizliklar moddasi bo‘yicha jinoiy ish qo‘zg‘atdi. Rossiyada ushbu jinoyat 8 yildan 15 yilgacha bo‘lgan muddatga ozodlikdan mahrum qilish bilan jazolanadi. Tartibsizliklarda 60 kishi hibsga olingani xabar berildi.
Izoh (0)