Turkmaniston 2023-yil uchun Ayollar Tinchlik va xavfsizlik indeksi (WPS Index) hisobotida 177 o‘rin ichida 58-o‘rinni egalladi. Bu Markaziy Osiyo davlatlari orasida eng yaxshi natijadir. Mintaqada keyingi o‘rinlarda Qozog‘iston — 70, Tojikiston — 90, O‘zbekiston — 94, Qirg‘iziston — 95 turibdi.
Dunyo bo‘yicha eng yaxshi ko‘rsatkichlar Daniya, Shveysariya va Shvetsiyada (mos ravishda birinchi, ikkinchi va uchinchi o‘rinlar), eng yomoni Afg‘oniston (177-o‘rin), Yaman (176) va Markaziy Afrika Respublikasida (175) qayd etilgan.
Reytingda AQSH — 37, Janubiy Koreya — 30 (Shimoliy Koreya ro‘yxatda yo‘q), Rossiya – 56, Xitoy – 82, Turkiya – 99, Eron – 140-o‘rinni egalladi.
WPS indeksini tayyorlashda uning mualliflari uchta toifaga taqsimlangan 13 ko‘rsatkich bo‘yicha mamlakatlardagi vaziyatni hisobga oladi:
- inklyuzivlik (ta’lim, moliyaviy inklyuzivlik, bandlik, mobil telefondan foydalanish, parlamentdagi ayollar ulushi);
- adolat (huquqiy diskriminatsiyaning yo‘qligi, adolatga erishish, onalar o‘limi ko‘rsatkichi, tarafkashlik);
- xavfsizlik (zo‘ravonlik darajasi, ayollarning jamiyatdagi xavfsizligini idrok etishi, ayollarga nisbatan siyosiy zo‘ravonlik, qurolli to‘qnashuvlarga yaqinlik darajasi).
Hisobot uchun ma’lumotlar BMT agentliklari, Jahon banki, Gallup global so‘rovlari va boshqa manbalardan to‘plangan.